New Delhi, Jymmang 15: Ka Power Finance Corporation ka la ai jingiarap pisa kaba T. 2.24 klur ha ka ban kyntiew ia ka sap treikam (Skill development) na ka bynta ki samla khlem kam khlem jam ba dei na ka kynhun SC/ST/OBC/ki briew ba don jingduna ha ki dkhot met/ ki kynthei bad ki briew kiba kham tlot ha ka imlang sahlang ba don ha ki hynriew tylli ki jylla jong ka thain shatei lammihngi lyngba ka jaka pule jong ka sorkar pdeng ba iadei bad ka rep ka riang (Central Agricultural University -CAU) ba don ha Manipur hapoh ka prokram CSR jong ka PFC na ka bynta ka samoi 2018-19.
Ia ka jingiateh ne ka Memorandum of Agreement la iasoi hapdeng ka PFC bad ka CAU ban pyntreikam ia kane ka projek ha ka College of PG Studies, Barapani, Meghalaya ha ka jingiadonlang u Rajeev Sharma, CMD, PFC, Prof. Premjit Singh, Vice-Chancellor, CAU bad u D Ravi, Director (Comm.) PFC. U Dinesh Vij, ED (CSR) u la soi ia ka jingiateh (MoU) na ka bynta ka PFC. Ha kane ka jingialang la iadonlang ruh ki nonghikai bad kiwei kiwei ki heh ophisar jong ka CAU.
Ka jingthmu jong ka projek CSR kalong ban ai jinghikai ia 390 ngut ki samla khlem kam khlem jam ba dei na ka kynhun SC/ST/OBC/ki briew kiba don jingduna ha ki dkhot met/ ki kynthei bad ki briew kiba kham tlot ha ka imlang sahlang ha hynriew tylli ki jylla ka thain shatei lammihngi. Ka CAU ka la wanrah haduh 13 tylli ki jingpule ha ka liang ka rep ka riang (Agriculture) da kaba pynthikna ba 70% ki samla kin lah ban seng kam seng jam lajong lane ban ieng ha la ki jong ki kjat bad ban plie ka lad kamai kajih na ka bynta ki nongioh jingmyntoi hadien ba ki la pyndep ia ka jingai jinghikai (training).
