Shillong, Naitung 9: Ka tnad jong ka sorkar pdeng ba dei peit ia ka mariang la “Indian Meteorological Department” mynta ka sngi kala pyntip paidbah ba kane ka jingslap kan dang beteng haduh ka sngi thohdieng, kin don ki jaka ba ka jingslap kan jur bha.
Halor kane ka jingpyntip jong ka IMD na ka liang jong ka ophis jong additional deputy Commissioner bad CEO DDMA, East Khasi Hills District la bethah ia ki paidbah ba kin long kiba husiar ban lait na kino kino ki jingjia kaba sngewsih.
La bethah ia ki paidbah ba ki dei ban kiar haba niah kali ha ki jaka ba lang um bad ban kiar na jan ki dieng eleltrik bad na ka bynta ki khynnah skul kim dei ban jam ia ki wah ha ka por ba jur u slap, ki nongwan jngohkai pyrthei kim dei ban leh shlur ha ki wah bad ki kshiad.
