Ieng pyrshah ki kmie ki kpa ia ki bor pyniaid ka Step by Step School ba shah thombor ki khun

Step by step SchoolShillong, Nailur 11: Ki kmie ki kpa jong ki khynnah skul kiba pule hapoh Step by Step School kaba don hapoh Barik Point, Shillong ki la ieng pyrshah ia ki bor pyniaid jong katei ka skul bad pynpaw ruh ia ka jingbitar shla halor ka jingshah ban bein ki khyllung bapli kiba dang pule hapoh ka kyrdan barit Class KG.

U Bah Banshai Marbaniang u wei na ki kpa ba phah skul khun ha kane ka skul step by step, u la ong ba ka  jingshah thombor jong ki khyllung hapoh kane ka skul kala sdang mynta u snem naduh mar syn plie ia ka ing skul kaba thymmai da kaba la kyntu ia ki kmie ki kpa ba kidei ban siew biang sa shisien pat ia ka bai rung skul kaba la kot sha ka 10,000 tyngka.

Kane ka jingpynbor ka la mih kynsan lyngba ka jingthoh ba la wah hapoh ka Notice Board kaba ym shym la don ba soi kyrteng mano mano ruh ne wat lyngba ki bor pyniaid ruh kumjuh. Ha kane ka jingthoh la bthah ba dei ban siew biang ia ka bai rung skul na ka bynta ban ioh rung sha ka Class – I, dei ban siew lypa ruh baroh shi snem kynthih ka bai shna ia ka Iing skul.

Kumjuh ki jingpynlut pynsep na bynta ka Bharat Scouts bad Guides, Red Cross, ka bai shon dur, ka bai print kot bad kiwei kiwei. Ym tang katta nalor kitei la bthah ruh ba dei ban siew lypa ia ka bai skul ba manla u bnai bad ka Smart Class na bynta u snem ban wan.

Kumjuh halor kane ka jingshah ban bein jong ki khyllung kiba pule hapoh kane skul Step by Step, kalong ba la shu pynmih kynsan kynsan dang ha une u snem 2018 ia ki kyndon ki bymlah ban pdiang da lei lei ruh em. Ki bor pyniaid jong katei ka skul ki la kyntu ia ki khynnah la jong kiba napoh ka Class KG ban hap iakhun biang ia ka Entrance Examination na bynta ban ioh rung sha ka Class 1 bad hap ruh ban siew ia ki jingdonkam katkum ba la bthah napoh ki bor pyniaid.

Kane ka jingleh jong ki bor pyniaid napoh katei ka skul ka la long ka jingiuhroit khlem da kheindor shuh wat ia la ki jong ki khynnah skul tang namar ka jingshim kabu bad iohlad ha kaban kamai spah kaba khlem don nongrim haei haei ruh, la ong u Bah Banshai Marbaniang ha ka kyrwoh.

Ia ki khyllung kiba dang rit ka rta khlem da niewkor shuh iaki bad la shu thombor naphang haduh wat ba la nud ban shim ia ki rai kiba kum kitei. Nalor katei ka Entrance Examination ki khyllung kin hap ruh ban iakhun pat sa iaka Final Examination na bynta ban kyntiew kyrdan iaki.

Kaei ka jingmut jong katei ka Skul bad balei ban hap ban pynmih ia ki aiñ iakjakor kiba kum kitei. “Katno tylli ki Final Examination ki khyllung kin hap ban iakhun. Lada ka skul ka donkam ban pynlong iaka entrance exam, hato donkam mo ban pynlong ia ka final exam?”

Lada ka long kumne ha baroh ar tylli ki exam, kata kamut ba ki khyllung kin hap ban mad ar tylli ki final exam hapdeng shi snem. Ka jingkylli kaba mih biang mynta ka long “hato kine ki riew shimet kiba seng skul ki wanrah ban hikai ia ka jingnang jingstad ne ki wan tangban kamai spah, la kylli biang u Bah Banshai.

Naduh ba sdang jong ka skul ym shym la don kano kano ka jingpynshai ne wat ruh ban lum ruh ia ka Parents meeting. Kynsan tang hapoh ki khyndiat sngi la shu pynbna ba dei ban thep ia katei ka pisa bad ruh ban bthah ia ki khun ban iakhun ia ka entrance exam. Kane ka la long thik kumba pyndonkam hapoh ki Medical College ne kiwei kiwei ki jaka pule jong ki kyrdan ba halor.

Kaei ka ban jia ia kito ki khyllung khynnah kiba ym shym la shah jied lyngba ka entrance exam. Kane ka jingleh jong ki bor pyniaid napoh katei ka skul ka la pynkulmar jingmut ia ki kmie ki kpa kiba phah pule ia ki khun hapoh katei ka skul bad kane ka la paw shai ba ki bor pyniaid kim lah ban beh jubor ia ki khynnah hynrei lyngba kine ki buit kan iarap ia ki kumno ban iohlad ban weng ia ki khynnah napoh katei ka skul.

Ki kmie ki kpa ki la ieng pyrshah bad ban tur kynsan puk naduh mynsngi thohdieng kumjuh ruh da kaba phah lyngba ka jingthoh mynne ka sngi haba iakynduh ia ki trai jong katei ka skul ryngkat ka jingdonlang u Principal. Lyngba ka jingthoh ki kmie ki  kpa kila dawa shisyn don ba dei ban weng noh khlem da buh kyndon ia baroh kitei ki jingpyniaid kiba khlem nongrim bad ruh ban pyniaid beit pyniaid ryntih ia ka skul kumba ka long naduh kaba sdang. Ki Kmie ki la dawa ruh ba dei ban khot ia ka parent’s meeting man la u snem khnang ban lah ban shim iaki rai na bynta ka jingbit jingbiang jong ka skul.

Hadien ka jingiakren kaba la neh kham slem la ioh ia ka jubab ba ym donkam shuh ban shim ia ka bai rung skul na bynta ka Class-I jong u snem 2019 kumjuh ruh ban ym donkam shuh ban pynlong ia ka Entrance Exam bad kiwei kiwei ki bynta kumba la mih ha kaba ia dei bad ki khynnah napoh katei ka skul.

Ha kaba pynkut ia kane ka kyrwoh na ka liang jong ki kmie ki kpa jong ka Step by Step School ki la buh ka jingkyrpad sha ki bor Sorkar lyngba ka Education Department ba dei ban thaw noh mardor ia ka Education Policy hapoh ka Jylla na bynta ka jingbit jingbiang khamtam ha kaba iadei bad ki skul shimet. Lada ynjin da la dei ba kane ka policy ka la don ngi ngeit skhem ba ki skul shimet kin ym nud ban thombor ne wat ban leh donbor ia ki khyllung khynnah khamtam ha kaba iadei bad kito ki khyllung kiba wan lyngba ki longing kiba duk kumba ka jia dang shen.

What Next?

Recent Articles

Leave a Reply

Submit Comment

*