Shillong, Jymmang 26: U samla Kennedy Dondor Richard Dunai na All Saints Diocesan Higher Secondary School, Shillong u la wan ban bat ia ka kyrdan kaba 5 napdeng ki 10 ngut kiba wan sha khmat eh ha ka result jong ka Secondary School Leaving Certificate (SSLC) ba la pynbna da ka Meghalaya Board of School Education (MBOSE) ha ka step 26 tarik u Jymmang, 2023.
Une u samla u dei uba ha khmat eh napdeng ki samla Khasi ban pass ia kane ka eksam mynta u snem 2023 ha kaba u la ioh 560 marks. Ia ka kyrdan ba nyngkong napdeng ki 10 ngut jong ka result SSLC la wan ban bat da Sherwood School, Tura lyngba ka Samridhya Das kaba la ioh khur 572 marks.
Ka St. Margaret Higher Secondary School, Shillong ka la ioh ban bat ia ka kyrdan ba ar lyngba ka Jyotipriya Bhattacharjee (570 marks). Ia ka kyrdan ba lai la bat ryngkat da lai tylli ki skul kata ka St. Margaret’s Higher Secondary School lyngba ka Tanushri Acharjee, ka Sherwood School, Tura lyngba u Ritam Deep Choudhary bad ka St. Xavier’s Secondary School, Tura lyngba u Salrime M Sangma kiba la ioh khur mar 564 marks.
Katba ia ka kyrdan ba saw pat la bat da ka Aeroville Higher Secondary School, Tura lyngba u Ronggrik B Sangma uba la ioh khur 562 marks. Ia ka kyrdan ba hynriew pat la ioh ban bat lang da ka St Dominic Savio’s Higher Secondary School, Shillong lyngba ka Felisha Kurkalang bad ka Sherwood School, Tura lyngba ka Sanskrita Karmakar kiba la ioh 599 marks.
Ka St. Anthony’s Higher Secondary School, Shillong ka la ioh ban khur ia ka kyrdan ba hynñiew lyngba u Anish Gurung (557 marks) katba ia ka kyrdan ba phra la ioh bat da ka Sibsing Memorial Government Higher Secondary School, Nongstoin lyngba u Springfield Snaitang uba la ioh 556 marks.
Ka Sanida Emi Pakma na St Mary’s Higher Secondary School, Shillong ka la ioh ban rung ha ka kyrdan ba khyndai da kaba ioh 555 marks. Ia ka kyrdan ba shiphew la bat da ka Christian Academy, Shillong lyngba ka Sandara Marpna, ka Synod Higher Secondary School, Shillong lyngba ka Isabella Mawlong bad ka Pallavi Phenang kaba iakhun na ki Priavte Institution kiba la khur mar 554 marks.
