Jowai, Nohprah 10: haduh 40 ngut ki samla kynthei kiba wan na ki shnong bapher bapher jong ka West Jaiñtia kila ïohpdiang mynta ka sngi ïa ki syrnot ban pynshisha ba kila pyndep ïa ka jinghikai kaba lai bnai lynter ha kaba ïa dei bad ka kam khapsñiuh bad pynbhabriew.
Ïa kane ka training ba lai bnai lynter la pynlong da ka Society for Urban and Rural Empowerment (SURE) ïa kaba la kyrshan pisa da ka Small Industries Development Bank of India (SIDBI), Shillong.
Ha ka jingïalang ban pynkut ïa kane ka jingai jinghikai; i kong B. Ladia iba long ruh ka nonghikai ïa kine ki samla ila kyntu ïa ki samla ba kin pyntreikam ïa ka jinghikai kaba kila ïoh khnang ba la ban long ka lad ïohkam ïohjam ïa ki.
Ula ong ruh ba ki samla kiba la pyndep ïaka jingshah hikai kiba wan na ki shnong nongkyndong ki lah ban sdang ban kamai da kane ka kam khnang ba kin lah ïeng hala ki jong ki kjat khlem da hap shaniah ha kiwei pat.
Ïa ki syrnot la sam da u Deputy Commissioner jong ka West Jaiñtia hills District, uba la kyntu ïa ki samla kynthei ban ym pynlehnoh ei ïa kaei kaba ki la ïoh jinghikai.
Naka liang jong u H.H.Mohrmen uba long u nongïalam jong ka SURE ula ong ba ka seng kan ïarap ïa kito kiba don jingmut ban ban seng kam lajong da kaba pynithuh ïa ki sha ki Bank bad kumjuh ruh ha kaban ïarap ba pynbiang ïa ki kot ki sla kiba donkam. Ha kane ka sngi la ïoh ruh ïa ka jingkren na ka kong Pasqualina Lamare kaba long ka Program Associate jong ka SURE.
