Ioh ka shnong Wahmawlein ia ka iing dorbar na ka skhim MDC u Bah Banteidor

Shillong, Naiwieng 20: Ka shnong Wahmawlein kaba hap hapoh jong ka Mawkynrew Constituency kala ioh ban plie paidbah ia ka Community Hall ia kaba la shna pynheh ha ka jingialang kaba iphuh iphieng ia kaba la pynlong ha katei hi ka Community Hall jong ka shnong Wahmawlein ha kaba la ia sakhi lang da ki longkmie longkpa, ki khun samla jong ka shnong, ki paidbah nong shong shnong bad kiwei de ki nong shah khot sngewbha. Ia katei ka jing shna pynheh ia ka Community Hall la lah ban pyndep da ka jing shimkhia jong u Bah Banteidor Lyngdoh MDC Mawkynrew Constituency uba la pynioh jingiarap lyngba ka Special Assistance Scheme jong ka KHADC kaba la kot sha ka 2.50 Lak tyngka.

Haba kren kum u kongsan ha katei ka sngi na ka liang jong u Bah Banteidor Lyngdoh MDC Mawkynrew Constituency u la ai jingiaroh ia ka Dorbar Shnong Pyllun Wahmawlein kaba la ai ia ka jing iatreilang tad haduh ban da lah ban pynurlong ia ka jingangnud na ka bynta ka jingbit jingbiang jong ki paidbah nong shong shnong khantam eh namar ba ka Shnong Wahmawlein kadei kawei na ki shnong kaba la wanrah burom ia ka Constituency hi baroh kawei  namar kadei ka shnong  kaba la ioh pdiang ia ka khusnam kum ka shnong kaba leh khuid leh suba ia kaba la iohpdiang na ki bor pyniaid jong ka District bad na ka jylla ruh kumjuh.

Shuh shuh na ka liang jong u kongsan u la ong ba kadei ka kamram jong u kum u Nongmihkhmat ban peit ban khmih ia ki jingdonkam jong u Paidbah da kaba bynrap ba kum u MDC ha i bor iba rit ula pyrshang katlah katiai ban wanrah ia ki kam pynroi ha ka constituency hi baroh kawei khlem da leh shiliang khmat iano iano ruh ha kaba u la kyntu ruh ia ki paidbah nong shong shnong ba kin nang bteng ban ai ia ka kti ka diang ka kti ka mon lada ki thrang bad angnud shisha ban wanrah ia kiba bun ki jingkylla.

Ia ka jingialang ha katei ka sngi la pyniaid da u Bah Lomdarwell Rangdong, Sordar Shnong Wahmawlein, la ioh ruh ia ka jingrwai kyrpang na u Bah Blester Kshiar, kiwei pat kiba la ai jingkren ha katei ka sngi ki kynthup ia u Bah Marphret Kshiar, Secretary Shnong Wahmawlein, U Bah Rapborlang Kshiar uba la ai jingkren na ka liang jong ka Sports Club, U Bah P. Suting, Overseer KHADC bad ia ka jingkren ai khublei na u Bah Markson Suting, Asst. Secretary Shnong Wahmawlein.