Shillong, Naiwieng 16: Mynta ka sngi ki pulit jong ka Ri Bhoi District kila pynlong ia ka jingap ktem bad kila bat ia kawei ka kali bad na kane ka kali kila ioh ban kurup 2.34 kilo ka ksiar bad ka shongdor T.1.5 klur tyngka.
Ki pulit kila ioh ban kem ruh ar ngut ki nongkhaii beain kiba la song bha ia ka ksiar, ki pulit na kitei ki ar ngut la ioh ruh ban kurup T.10.89 lak tyngka, ki pulit kila kurup ia ka kali, kurup lang san tylli ki phone bad kawei ka Laptop.
Na ka liang jong ki pulit kila pynlong ia kane ka jingap ktem ha dien ba kila ioh ia ka jingtip ba kin sa don ki nongkhaii beain ki ban iaid lyngba ka GS Road, haba la ioh ia kane ka jingtip kila pynlong ia ka jingtalasi ia ki kali bad kila ioh ban bat bad la lap ia kine ki tiar.
Ki pulit jong ka Byrnihat kila register ia kane ka ehajar bad ka jingtohkit ka dang iaid ban lap shuh shuh ia kiba don kti ha kane ka jingiakhaii beain, kine ki briew mynta ki don ha kti ki pulit ban tohkit.
