Shillong, Naitung 07: Ki lai tylli ki seng bhalang, ka FKJGP, HNYF bad ka RBYF ha ka jingiakynduh lang ka jong ki mynta ka sngi ki la shim ia ka rai ba kin sdang ia ka jingiakhih paidbah da kaba jai jai pyrshah ia ka lynti rel ha kine ki jaka khasi da kaba kin pynlong ia ki jingialang paidbah ha kylleng ka Ri Khasi. La ong u Bah W. Rani president jong ka FKJGP.
Haba kren ha ki nongthoh khubor ha dien ba la wai ka jingialang, kitei ki lai tylli ki seng kila shim ia ka rai ba lada ioh ne khlem ioh jingbit ruh ka jingialang paidbah kan long beit ha Nongpoh ha ka 13 tarik mynta u bnai, kan but sa ka jingialang paidbah ha Byrnihat ha ka 18 tarik bad ha Umsning kan long ha ka 21 tarik jong mynta u bnai.
Ha dien jong kane ka jingialang paidbah, kin sa pynbna ia ki tarik ban pynlong ia kum kane ka juh ka jingialang ha Mawlai, Nongthymmai bad ha Malki bad kin sa but sa ha ki District Headquarter bad ka jingialang kaba heh duh pat kin pynkut ha Mawkhar. Ka jingthmu ban pynlong ia kine ki jingialang paidbah ka long ban pynshai halor ka lynti rel bad ha ka juh ka por ban pan ia ka jingkyrshan na u paidbah halor kane ka jingpyrshah ia ka lynti rel.
Na ka liang jong ki tei ki lai tylli ki seng, ki ong ba ka sorkar kam dei ban shu ban shubret ia ki jingeh sha ka District Administration, kumba ka long mynta ka sorkar kala leh mynthi ha kaba ia dei bad kane ka kam. Na ka liang jong ki lai seng ki dawa na ka sorkar ba ka dei ban sangeh noh ia ka jingthwet ia ki dkhot jong ka seng KSU.
Haba ia dei bad ka kam Lynti la ong ba kane ka dei ka mat kaba ktah ia ka jaidbynriew, na ka liang jong ki seng bhalang ki khlem pyrshah ia ka lynti rel, hynrei kaei kaba ki dawa ka long buh shuwa ia ki lad jingiada. Kaei kaba ki kwah ka long beit ia ka jingiakren bad haba don ka jingiakren ka mih ka jingbha. Kumba ka long mynta u Myntri rangbah ka jylla u long kuman, lada u myntri rangbah u bat ia la ka kular kumba u la ong ba shuwa ban sdang ia ka lynti rel kin ia kren shuwa kane ka jingeh kan nym mih.
Na ka liang jong ki seng bhalang kila thoh naduh u bnai Iaiong mynta u snem ban ia kren hynrei um shym la khot ia kata ka jingiakren haduh mynta ban da mih kane ka jinghuri hura. Haba ia dei ba ka jingkawang petrol bom ia ki ophis ka sorkar ka hap ban tohkit bha ym dei ban shutei pop ia ki seng bhalang.
