Shillong, Naitung 07: Mynta ka sngi dang saw tyngap ka bneng ki dkhot ka KSU Delhi Unit ryngkat ki pulit jong ka nongbah Delhi ha ka por lai baje mynstep kila ioh ban pynlait ia ki samla kiba shah khangtala ha poh jaka ai dawai ha nongbah Delhi, ha ka por saw baje mynstep.
Ha ka kyrwoh kaba la phah da ka KSU mynta ka sngi, ka KSU Delhi hapoh ka Jingïalam jong u Vice President, U Samla Wallamkupar Nongsiej hadien ba ka la ioh jingujor na ki baha ïng ba arngut ki Samla Kynthei Khasi bad u Samla Garo.
Kitei ki lai ngut kila shah pynbor ban trei jubor hapoh kawei ka Ayurveda clinic kaba la tip kyrteng kum ka Susmay Arogya Clinic ka ba don ha Dilshad Garden, West Delhi wat ha dien ba kila mih noh na katei ka jaka ba ki trei.
Katkum ka jingujor kiba ha iing ba wat hadien ka jingmih noh ka jong ki na katei ka kam, ha ka 6 tarik mynta u bnai ha ka por 11 baje nynmiet, u Trai jong katei ka Clinic uba tip kyrteng kum U Ashish ula phah leitshaw jubor ïaki napoh ka PG kaba ki sah kaba don ha Shlimar bagh.
Ha dien bala wanshaw jubor , ialam iaki shapoh clinic ha ryngkat ka byrngem byrsit, la thmu pynsah jubor iaki ha katei ka clinic da kaba la khang tala syndon iaki baroh lai ngut hapoh jong katei ka clinic.
Ka KSU Delhi Unit mar mar ka la wad lad jingiarap na kylleng bad ha ryngkat ka jingiatreilang bad u Dr. Raghavendra IPS MLP Delhi bad ka jingiarap na U SHO ka Seema Puri; Delhi Police, la lah ban pyllait iaki bad ïa pynbeit iakane kam haduh 4 baje mynstep.
Na ka liang ka Seng, ka pynrem jur ia katei ka jingleh donbor bad ha kajuh ka por ruh ka KSU Delhi Unit ka Kyntu iaki Samla Kynthei bad Shynrang ba kidei ban da thikna bad wad bñiah hashwa ba kin leit trei ïa kino ki kam kiba don hapoh Nongbah Delhi.
