Shillong, Naitung 23: Ki shipai Bangladesh Border Guard (BGB) kila ioh ban pynlait ia u Bah Ricky Marwein na ka kti jong ki nongrah bor ha Bangladesh ha ka por ba ki dang kylliang jaka rieh, ia kaba la lap da ki pulit bad la ioh ioh bad da ki BGB kat ba ki dang pynlong ia ka jingkhynra ha ka jaka kaba ki suba ba don ki nongrah bor.
Kane jingkhynra jong ki BGB ka long ha dien ba na ka liang jong ki BSF kila pyntip sha ki BGB ia ka jaka kaba ki suba ba don ki nongrah bor ia u Bah Ricky u ba dei na ka shnong Umsur u ba na South West Khasi Hills District. Haka por ba ki dang khynra ki pulit bad ki BSF kine ki nongrah bor kila mut ban kylliang jaka rieh dei ha kane ka por la ioh ban bat ia u Bah Marwein ha Bangladesh.
Na ka liang jong ki BGB bad ki pulit jong katei ka ri ki khlem ioh ban kem ia kine ki nongrahbor namar ka thong kaba ha khmat eh ka jong ki ka long kumno ban pynlait ia u Bah Ricky na ka kti jong ki nongrahbor ha kaba ki lah ban pynlait ia u tei u rangbah ba kan lait na kano kano ka jingjia kaba sngewsih.
Na ka liang jong ki BSF ki don ka jingkyrmen ba ki BGB bad ki pulit jong katei ka ri kin sa ioh kem ia kine ki nongleh kam sniew kiba juh mlieh ban rah bor ia ki briew ha khappud India Bangladesh, namar na ka liang jong ki BSF ki la dep ban ai ia ki jingtip sha ki BGB ha kaba ia dei bad katei ka kynhun.
Ha ka juh ka por ki thymmei khubor ki iathuh ba na ka liang jong ki BSF kila juh kren ia ka sorkar Meghalaya ba ka dei ban pyndep noh ia ka jingker ksianar shiah ha katei ka thian, ka jingslem jong kane ka jingker ksainar ka dei na ka jingbym ia treilang ki briew na katei ka thain bad kane kala pynlong ia ki riew sniew na Bangladesh ba kin rung kin mih da kaba suk ynda kila leh ia ki kam sniew ha India.
