Shillong, Nohprah 08: Ha ka sngi kaba ar jong ka 7th Bull N Lyngdoh Memorial Football Tournament ka wanrah ia u nam jop sha ka KSU South West Khasi Hills District Unit bad ka KSU Shillong Mihngi Circle.
Ha ka jingialehkai kaba nyngkong ka KSU SWKHDU ka la jop ia ka KSU Eastern Central Area Unit da 4 kol la 1. Ha ka jingialehkai kaba ar pat ka KSU Shillong Mihngi Circle ka la ia khaid bad ka KSU Jaintia Hills District Unit da mar shi kol. Ban rai ia ka lahduh la pynshut da ka tie breaker ha kaba ka Shillong Mihngi ka la thep 4 kol bad ka JHDU pat ka la thep 2 kol.
Lashai ka sngi ka jingialehkai kan long hapdeng ka KSU Nongthymmai Circle pyrshah ia ka KSU South Khasi Hills District Unit ha ka por 12 baje nohphai sngi bad ka KSU Mawlai Circle pyrshah ia ka KSU Sohiong Circle ha ka por 2 baje nohphai sngi.
Ha kawei pat ka jingialehkai, Ka KSU Malki Circle kumba ju long man u snem, ka la pyniaid biang ia ka 7th Bull N Lyngdoh Memorial Invitation Football Tournament ha madan Malki kaba la sdang mynnin ka sngi (7/12/2017). Kane ka prokram ka dei ka knock-out tournament ha kaba la sdang dang ka jingialehkai hapdeng ka KSU Malki Circle bad ka KSU Upper Shillong Circle ha ka por 11:30 AM.
Ha kane ka jingialehkai ka Upper Shillong ka la jop ia ka Malki da 3 la nod. Hadien kane ka jingialehkai ka long hapdeng ka KSU West Khasi Hills District Unit pyrshah ia ka KSU North Khasi Hills District Unit ha kaba ka West Khasi Hills ka la jop ia ka North Khasi Hills da 5 kol la 0.
