Shillong, Jylliew 19: Ka elekshon MP sha Rajya Sabha na ka jylla Meghalaya kala long mynta ka sngi ha kaba u Dr Wanwei Roy Kharlukhi jong ka NPP u la jor pyrshah ia u kyrtong ka seng Congress u Bah Kennedy C Khyriem da 20 vote.
Ha ka iing dorbar ka 60 ngut ki MLA, kiba la wan ban thep vote ki long 59 ngut namar u Bah Adelbert Nongrum ym shym la wan thep ia ka vote jong u. Ha kane ka jingiathep vote u Dr Kharlukhi u la ioh 39 vote u bah Kennedy V Khyriem u la ioh 19 vote bad kawei ka vote kala shah kyntait.
U Dr Kharlukhi la pynieng da ka party NPP kaba ialam ia kane ka sorkar khleh khawlang ia kaba la ai ka jingkyrshan da ka kynhun Meghalaya Democratic Alliance ha kaba baroh ki MLA ki don 41 ngut bad ka Congress ka don 19 ngut ki MLA.
Ka jingbym wan jong u Bah Adelbert Nongrum kala pynlong ba ki dkhot ka MDA kiba la wan thep vote kin long 40 ngut, hynrei ka wei ka vote kala shah kyntait bad u kyrtong ka NPP u Dr Kharlukhi u la jop pyrshah ia u kyrtong ka Congress da 20 vote.
U Dr Kharlukhi u dei na Jowai, u dei u khun jong u bah Iehnoh Laloo bam kwai ha dwar u blei bad jong ka Kong Emslieban Kharlukhi, ia u la kha ha ka 27th Naiwieng 1956. U la sdang ia ka jingpule jong u ha St, Mary’s Mazzerello Jowai bad pyndep ia ka kyrdan Phd na NEHU ha ka Political Science.
Ha ka jingiaid lynti, ha u snem 1972 u la shah jied kum u President ka Jiantia Students Union bad ha u snem 1980 kila thaw ia ka Meghalaya Students Union bad ha u snem 1984 u la long u nonghikai hapoh jong ka Synod College bad ha u snem 1986 u la don ha ka sian pyrthei da ka rung ha ka HPU ha u snem 1997 u la don ha ka UDP bad iehnoh ia ka ha u snem 1999.
Dei ha u snem 1999 u la rung sha ka party NCP bad u PA Sangma bam kwai ha dwar u blei u la don ha kane ka party bad dei ha u snem 2007 haduh 2012 u la shah jied kum u president ka NCP ha Meghalaya bad ha u snem 2012 jong u Nailar haba la thap ia ka NPP u la don ha kane ka party haduh mynta kum u President jong ka party Meghalaya State Unit.
