Jubbor ka jingjyllei ka jingiakhaii Benami ha ka kam tih dewiong ha ka jylla: Dr Mukul

Shillong, Nohprah 13: U myntri rangbah u Dr Mukul Sangma haba jubab ia ka mat jingiakren kaba la wanrah da u Bah Pynshngianlang Syiem halor ka phang “ Ka MMDC kan pyntih ia u dewiong ha ka kyrteng jong ki trai par”. U myntri rangbah u la ong ba ka sorkar kala wad ia ki lad ki  lynti ban pynlait na ka jingkhang tih dewiong katkum ka ain.

Katkum ka MMDR Act jong ka sorkar pdeng, la khang ia ki riew shimet ban tih dewiong bad dei tang ki kompeny jong ka sorkar bad ka jylla Meghalaya ka don ia ka MMDC, u myntri rangbah u la kren shai ba ka jingpyntrei da ka MMDC kan nym don jingiadei ei ei bad ka jingbat khyndew bat shyiap. Ha dien ba la lut u mar poh khyndew na ka jaka hap ban pynbha biang ia ka bad ka jaka ka leit biang sha ki trai khyndew.

Kaei kaba ki trai jaka ki hap ban leh ka long ba kin ia soi ia ka kot ia sngewthuh jingthuh jingmut bad ka MMDC, ka MMDC kan pynbiang ia ki jingdon kam baroh bad kan pyntrei ha ka kyrteng jong ki trai bad ka jingioh nong kan long 25% kan leit sha MMDC bad ki trai jaka kin ioh 75%. Ka sorkar kan iarap ia ka MMDC ba kan beit pisa kumba bei ki Marwari na ka bynta kane ka kam tih dewiong.

U myntri rangbah u la ong ba la katta snem ka la don ka jingtih dewiong ha kane ka jylla sha ei kata ka spah ka leit, hato kam dei ba kala jylla ka jingtrei benami ha kaba ka jingiohnong baroh ka leit sha ki nongbei pisa katba u trai jaka ym ioh ei ei shuh. Kane eh aiu lada ka MMDC ka pyntrei ha kaba ki trai jaka kin kylla long ki Syiem kin ioh ia ka bainong jong ki ha ka rukom kaba shai kdar.

U myntri rangbah u la ong ba kane ka iing dorbar kala shim ia ka rai ban thoh sha ka sorkar pdeng ban pynlait ia ka jingtih dewiong sha kane ka jylla katkum ka kyndon jong ka Para 12 (a) (b) jong ka Sixth Schedule, halor kane ka sorkar pdeng kala thaw ia ka Committee ba la khlieh da u Cabinet Secretary bad kane ka Committee kala ia shong bun sien ban ia kren ia kane ka kam bad ha ka juh ka por ka jingpynkhreh ban wanrah ia ka jingkylla ha ka Sixth Schedule ruh kala iaid sha khmat mynta.

Kane ka jingwad lad jong ka sorkar jylla ka long ban pynlait ia ki paidbah na kane ka jingeh ha ka jingshah khang tih dewiong. U myntri rangbah u la ong ba ha ka jingshisha ka NGT kam shym khang ia ka jingtih dewiong, Ka jingkhang ka long tang ha kito ki jaka kiba la tih beain bad ka jingtih dewiong ha kane ka jylla ka long beain. U myntri rangbah u la iathuh hapoh ka iing dorbar ba ka sorkar pdeng kala dep thoh sha ka sorkar jylla na duh snem 1987 ha kaba ia dei bad kane ka kam hynrei ym shym la leh ei ei bad sa mih kane ka jingeh.

Haba wanrah ia kane ka mat jingiakren na ka liang jong u Bah Pynshngianlang Syiem u la ong ba ka sorkar ka dei ban sngewthuh shai kdar ia ka jinglong ka rukom bat khyndew ha kane ka jylla, ki trai khyndew ki long ki trai wat ia ki marpoh khyndew naduh ki por kulong kumah, Na ka liang jong u Bah Pynshngianlang u la ong ba ka sorkar ka dei ban khot ia ka jingialang ha pdeng ka sorkar, ki Nokmas, ki rangbah shnong ki Syiem bad ki trai jaka ban ia kren bha ia kane ka kam. Kumba ka long haba ki trai ki ia soi ia ka jingiateh kular bad ka MMDC ka MMDC pat kan ia soi bad ki kompeny ha kaba ki trai jaka kim tip ei ei shuh.

What Next?

Recent Articles

Leave a Reply

Submit Comment

*