Shillong, Lber 31: Mynta ka sngi ha ka por kuma 2.30 baje ei ei dang step phyrngap ka ding kala klang kynsah ha kaba 15 tylli ki dukan kila julor ha Mawlai Mawdatbaki ba don ha stan bus Mawlai, katba ki ar tylli ki kali ruh kila duh ha kane ka jingpluh ding.
Katkum ka jingithuh jong u wei na ki trai dukan ba la ngat ha kane ka jingjia kaba sngewsih khlem da kwah ban pynpaw kyrteng, la ong ba baroh ki dukan kiba la iengkhong lut ki long 15 tylli, ia ka daw kim lah ban tip namar ka jingjia ka long hapdeng 2.30 bad 3.00 baje mynstep.
La iathuh ba baroh ki trai dukan ki dei kiba la shu shongwai bad ka trai jong ki dukan ka dei ka kong B Lyngdoh Nongbri, la iathuh haduh ban da ioh sngew ki briew ia kane ka jingpluh ding, ka ding kala klang haduh bay m lah shuh ban tem ia ka, baroh ki mar ki matta kiba don ha ki dukan kila duh ei khoit.
Haba la pyrshang ban kylli ia ka daw jong kane jingpluh ding la ong ba ia kata ym lah ban tip namar kala jia ha ka por step ha kaba ki briew ki dang thiah, la ong ba na ka liang jong ki pulit kila wan bad kila tohkit ia kane ka jingjia.
Haba ia dei bad ka jingduh ha kane ka jingpluh ki dukan la ong ba ia ka jingkhein kaba thikna yn nym lah ban ioh namar ka jingdie ia ki mar ki matta ka iapher na kawei ka dukan sha kawei pat, hynrei la atnad ba ka jingduh ka la long bun lak tyngka.
