Shillong, Naitung 15: Ha ka miet sngi Saitjain por shiteng ki riew sniew kiba ym lah ban tip kila ther maw ia ki trok kit Mawshun ban leit shallan sha Bangladesh ha Beltoli Lum Sohriew ha kaba bun jylli ki trok kila julor ha kane ka jingshah thermaw ha ki riew sniew kiba ym lah ban tip.
Katkum ki tyllong khubor kiba la lah ban ioh la iathuh ba kane ka jingshah ther maw ka long ha ka por miet ha kaba ki trok kila ieng ha surok ryngkat ka jingkit. Kane ka jingshah thermaw ka long ia ki trok kiba la ieng ha surok jong ka PWD bad kiba shah ther maw ki dei kiba sha dien duh ha kane ka jingienglain ki kali ki don palat spah tylli.
Na ka liang jong ki pulit kiba don ha Shella bad ha Tyllad kila leit bran bran sha kane ka jaka ban thwet ia kine ki riew sniew kiba la kawang maw ia ki trok bad kane ka jingjia ha kane ka miet kala wan rah ia ka jingshong syier ha katei ka jaka.
Kumba ka dak jong ki jingpyrshah ia kane ka jingshah ther maw ki trok kit mawshun na ka liang jong ki nongniah trok kila rai ba la shai ka sngi kin sangeh ka jingkit maw shun ban shallan sha Bangladesh bad ban dawa na ki pulit ba dei ban kem mardor ia kine ki riew sniew.
Lah ban pynkynmaw ha ba ki snem kiba la dep ha kane ka juh ka jaka ki riew sniew kila ther maw ruh wat ia ki kali jong ki pulit kiba iaid pahara ha kane ka jaka. Na ka liang jong ki nongkhaii mawshun ki dawa na ka sorkar ba dei ban puh ia ki pulit pahara ha kane ka jaka namar kum kane ka jingjia ki juh jia ha kane ka surok man ka por.
