Ka 22nd National Conference ba ar sngi halor ka  e-Governance kala kut mynta ka sngi

Shillong, Nailar 09: Ka Department of Administrative Reforms bad Public Grievances (DARPG), ha ka jingiatreilang bad ka Ministry of Electronics bad Information Technology (MeitY), sorkar India bad ka sorkar jylla Meghalaya ki la pynlong ia ka 22nd National Conference on e-Governance (NCeG) 2019 ha ka  8-9 tarik Nailar, 2019 ha nongbah Shillong, Meghalaya.

Ka phang pdeng jong kane ka Conference kalong “Digital India: Success to Excellence”. Ha ka jingialang pynkut mynta ka sngi, la jied ban sdang ia ka ‘Shillong Declaration’ halor ka e-Governance hadien ki jingiamir jingmut ba bniah ha ki session ba la long ha kine ki ar sngi.

U Secretary, DARPG, K.V. Eapen, ha ka jingai jingkren jong u ha ka jingialang pynhap pyrda, u la ong ba ka NCeG 2019 kalong kawei na ki conference kaba iar ba kynthup shibun ha ki jingmut jingpyrkhat ba la pynlong haduh mynta. Ka sorkar jylla ka la leh ia ka bynta kaba bha, u la kdew.

Shuh shuh, u Eapen u la pynpaw ka jingsngewnguh ia ki jingiamir jingmut ba shongkhia bad ki jingpynshai ba la ai da ki dkhot ba iashim bynta ha kane ka conference. U la pynpaw ka jingsngewskhem ba ka NCeG 2019 ka la ai ia baroh ki kynhun sorkar jylla ba la iashim bynta ba kin leit phai ryngkat ki buit ba kongsan ba lah ban pyntreikam ha ki jylla bapher bapher.

U Chief Secretary jong ka sorkar Meghalaya, Bah P.S. Thangkhiew, u la ai jingiaroh ia ka mynsiem ba shitrhem bad ka jingaiti jong ka kynhun kaba pynlong ia kane ka conference bad kitbok kitrwiang ia baroh ki dkhot (delegate) ba kin pyntreikam ia kaei kaba ki la ioh jingnang jingtip na kane ka conference.

Ha kine ki ar sngi, la pynlong ia ki jingiamir jingmut halor ki hynriew tylli ki sub-theme ha ki Plenary session – India Enterprise Architecture (INDEA), Digital Infrastructure, Inclusion and capacity building, Emerging Technology for Practitioners, Secretariat Reforms, National e-Governance Service Delivery Assessment (NeSDA).

La pynlong ruh saw tylli ki Breakout Session halor ki sub-theme – One Nation One Platform, Engaging with Innovators and Industry, End-to-End Digital Services: IT initiatives of State Governments. La pynlong ruh ia ka Exhibition ha kane ka jingialang ban pyni ia ki jingjop jong ka India ha ka liang ka e-Governance.

Ka NCeG 2019 ka long ka rynsan na ka bynta ki dkhot, ba kynthup ia ki ophisar rangbah jong ka sorkar na kylleng ka ri, ki riewpawkhmat jong ka industry bad ki stad wad bniah, ban iasam ia ki rukom treikam ba bit ba biang, ka jingkyntiew ia ka tekonoloji bad ka jingpyndonkam ia ki ban ioh ia ka synshar khadar kaba bit ba biang bad ka jingai jingshakri sha ki paidbah.

Ka jingphaikhmat ha baroh ki session kalong halor ka jingioh jinghikai na ki jingshemphang jong iwei na iwei pat ban pynthikna ia ka e-governance kaba bit ba biang na ka bynta ka jinghun jong ki nongshong shnong bad ban lah ban kot sha ka thong jong u Myntri rangbah duh ka ri, Narendra Modi ha kaba iadei bad ka ‘Minimum Government, Maximum Governance’.

U Myntri khynnah jong ka sorkar pdeng (Independent Charge) jong ka Ministry of Development of North Eastern Region bad Myntri khynnah jong ka Prime Minister’s Office, Ministry of Personnel, Public Grievances & Pensions, Department of Atomic Energy and Department of Space, Dr. Jitendra Singh bad u Conrad K Sangma, Myntri rangbah ka jylla Meghalaya ki la plie ia ka conference ha ka 8 tarik Nailar.

 

 

What Next?

Recent Articles

Leave a Reply

Submit Comment

*