Shillong, Risaw 20: Ki 29,970 ngut ki paidbah nongthep vote kiba don hapoh jong ka 26-Shella Assembly Constituency kin thep ia ka vote jong ki la shai ka sngi ha kane ka ilekshon shiteng samoi ban jied u wei na pdeng ki 6 ngut ki kyrtong ban long MLA ia ki ha kine ki lai snem kiba dang sah.
Ki kyrtong kiba la ia khun ia kane ka ilekshon MLA shiteng samoi ki long u bah Balajiedkupar Synrem, UDP, bah Komen Laitmon, Ind, Kong Grace Mary Kharpuri, Ind, Bah Batyngshain Laitmon Ryngnga INC, Bah Joshua Warjri BJP, bad u bah Mosjo Rock F. Wanswett PDF.
Mynta ka sngi baroh ki polling ophisar kila leit lut sha ki jaka thep vote ban pyniaid ia ka ilekshon ka ban long la shai ka sngi. Na ka liang jong ki bor pyniaid ia ka ilekshon kila pynbiang ia ki lad pahara ban peit ba ka ilekshon kan iaid beit iaid ryngtih. Ka 26-Shella Konstitwensi ka don 29,970 ngut ki nongthep vote, la shai kin jied ia u MLA.
