Shillong, Nohprah 12: U bah Andrew Saimon President jong ka Meghalaya Tennis Association (MTA) mynta ka sngi u la pynbna ba ka jingialehkai kaba 6th Meghalaya State Tennis Tournament 2018 kan long saw sngi lynter ha Shillong.
Haba kren ha ki nongthoh khubor mynta ka sngi, u bah Saimon president jong ka seng u la ong ba ki nongiashim bynta ha kane ka jingialehkai na kane ka jylla kin poi sha ka 40 ngut bad mynta ka kynti na Garo Hills kin nym lah ban wan ia shim bynta wat la ki juh wan man u snem ha ki por kiba la dep.
La iathuh ruh ba kane ka jingialehkai Tennis ka dei kawei na ki jingialeh hapoh jong ka National Games bad ka jylla Meghalaya ha u snem 2022 kan sa pdiang ia ka National Games hynrei kaba ki sngewdiaw ka long ba haduh mynta kim pat don ki jaka ialehkai na ka bynta ki samla kiba kwah ban ialehkai ha kane ka Tenis.
La ong ba wat ia kane ka Meghalaya State Tennis Tournament la hap ban pynlong hapoh jong ka madan jong ka Shillong Club namar ba kaei kaba ki madan kiba don ha Polo kiba dei jong ka sorkar ym shym la sumar bha ia ki ha kaba kim lah ban pynlong ia kane ka jingialehkai.
Ka MTA kala pynpaw ruh ia ka jingsngewnguh ia ka Max Cement bad Star Cement kiba la ai ka jingkyrshan na ka bynta kane ka jingialehkai kaban sdang ha ka 15 bad kan kut ha ka 18 tarik mynta u bnai ha kane ka nongbah Shillong. Haba jubab ia ki jingkylli la ong ba na ka liang jong ka sorkar kala kular ban ai jingiarap ha dien.
Ki nongkit kam jong ka seng kiba la don lang ha kane ka sngi ki long u bah Stadhi Nongrum general secretary, u SK Choudhury, Rahul Bajaj, Jerry Tochhang kiba dei ki dkhot jong ka EC bad Parambia Singh president ba rim jong ka seng.
