Jowai, Naiwieng, 07: Ka AJYWO – Central Body, kam hun sa tia ia ka jingai jingtip jong ka JHADC ia ka jingdon ki Trading License hapoh Jaintia Hills kat kum ka RTI ba dang shu ioh shen ba la file da u Bah Reachingson Siang Shiang u ba long ruh u Vice President jong ka seng.
Kumta namar bym pat hun bad ruh ban bud dien shuh shuh ia katei katei ka ishu, ka seng, lyngba u Bah Reachingson Siangshai ka la file biang da ka RTI ban lap shuh shuh halor ka jingshisha halor ki Trading License ha Jaintia Hills.
“Lada ngi peit mynta hapoh Jaintia Hills, ki don da ki hajar hajar tylli ki Non-Tribal kiba leh business, hynrei kaba lyngngoh pat ka long ba balei tang 2785 tylli kiba don Trading Licence bad na kitei ki kiba 2785 tylli don tang kumba 321 tylli kiba valid. Shaei jah ki tei ki wei pat da ki hajar tylli? Balei kim wan renew? Balei ba ha kiba bun ki bynta ka Jaintia Hill ba leh business ki Non-Traibal kim don Trading License lut?
Lada baroh ki dukan Non-Traibal ki don Trading License balei kim pyni paidbah ia ki Trading License jong ki ia ka kat kum ki kyndon jong ka JHADC ha ki dukan jong ki? Balei ki burieh ia ka? Hato, ba kim don Trading License ne ne ba kim pynthymmai (renew) ne ba ki leh business palat ia ki kyndon ba la kdew ha ki Trading License jong ki ne don kiwei pat ki daw halor kane? Ka Seng ka kwah ban tip ia kane.
Lada kat kine ki Non-Trabal ki ba wan leh business ha Jaintia Hills kim don Trading License lut lane kim shym la wan renew lut baroh, hato kam dei ka kam beaiñ? Mano ban duh nong na ka jingbym pyntrei kam ia ka Trading License kat kum ba ka dei ban long ka JHADC ne ki Non-Tribal ne ka Jaidbynriew?
Lada kat kum ka jingai jingtip ba la ioh na ka JHADC don tang 321 ki Valid Trading License, ka jingkylli ka long; Shaei ka JHADC ka jah? Shaei ki MDC ki jah? Shaei ki nongtrei jong ka JHADC ki ba dei peit ia ka Trading License ki jah? Shaei ka “The Jaintia Hills Autonomous District (Trading By Non-Tribal) Regulation (Act) 2011 ka jah? Shaei ka “The Jaintia Hills Autonomous District (Trading By Non-Tribal) Rules, 2015” ? Lada ha kane ka rukom kiba nabar ki ioh ban wan leh business pathar kat bam on khlem da iaid kat kum ki kyndon aiñ, shaei ka lawei jong ka jaibynriew? Ngi kwah ban tip ia kane.
Lada ki Non-Tribal ki lah ban iaid lait ia ki aiñ jong ka JHADC, balei ki trai ri trai muluk ruh kim lah seh ban iaid lait ia kino kino ki kyndon jong ka JHADC? Balei tang ki trai ri trai muluk ki ban hap iaid thik pa thik kat kum ki aiñ jong ka JHADC?
Kunmta ha ka jingiadei bad ka Trading License, ka seng ka dawa ruh na ka JHADC ban iakren bad iatai sani bha ia kane ka ishu Trading License ha kane ka ka Dorbar Tlang jong ka. Ngi kwah ban iohi ba ka JHADC kam dei ban thiah sngi ha ka jingiadei bad ka Trading License hynrei ka dei ban khie thiah noh bad trei noh la ka jong ka kam.
Ngin ym shong kli kti bad ngi la rai kut ruh ban buddien haduh ban da shai kdar ia kane ka phang (Trading License) bad ban pynthikna ba baroh ki Non-Tribal kiba khaii-pateng hapoh Jaintia Hills kidei ban don Trading Licence bad ruh ba ym dei ban ai pathar ia ki Trading License na ka bynta ka jingmyntoi jong ka Jaidbynriew.
