Shillong, Iaiong 16: Ka bai light kaba ka sorkar Meghalaya ka dang hap ban siew sha ka North Eastern Electric Power Corporation Limited (NEEPCO) haduh mynta ka long T.550 klur tyngka. Kane ka dei ka pisa kaba la long naduh ka por jong ka sorkar Congress bad kane ka sorkar kaba mynta.
Haba kren ha ki lad pathai khubor mynta ka sngi ha kamra trei kam, na ka liang jong u Conrad K Sangma u la ong ba kane ka pisa bai light ka dei kaba la lang naduh ka sorkar Congress bad jong kane ka sorkar kaba mynta.
U myntri rangbah u la ong ba kam dei kaba suk ia ka sorkar ba kan siew shisien shiew ia kane ka pisa kaba la sah la bun bun snem bad na ka liang jong ka NEEPCO ruh ka sngewthuh ia kane ka jingeh jong ka sorkar jylla.
Na ka liang jong ka sorkar ka ialeh ban siew ia kane ka pisa kaba sah na ka por sha ka por bad ka NEEPCO ka iohi ia kane ka jingleh jong kane ka sorkar kaba mynta ban siew ia ka bai light.
Haba ia dei bad ka jingpynlip light na ka liang jong u myntri rangbah, u la ong ba kane ka jingpynlip light kam dei ka sien kaba nyngkong, hynrei la juh leh ruh ha ki por ba la leit ruh, hynrei na ka liang jong kane ka sorkar kaba mynta kala pyrshang katba lah ban pynduna ia kane ka jingpynlip light da kaba siew ia ka bai light kaba sah bad ka NEEPCO la ong u myntri rangbah ka jylla u Cornad K Sangma.
