Shillong, Nohprah 12: U President jong ka seng HSPDP u Bah Ardent Miller Basaiawmoit, ha ka jingkren jong u ha ka jingialang paidbah jong ka party kaba la long mynta ka sngi hapoh Madan Malki, u la kynnoh ba ka seng BJP ka dei ka shnat jong ka RSS, ka ba thmu ban wan rah hapoh jong ka Ri India kawei ka ain.
Ha kane ka jingialang u la ong ba ka jingiateh lok jong ka seng HSPDP bad k UDP ka long ban wanrah ia ka sorkar jong ki seng riewlum kaba lait na ka seng Congress bad ka ka seng BJP. Ka seng HSPDP ka ieng hala ka nongrim ban iada ia la ka jong ka jaid bynriew.
Ha kane ka jingialang paidbah u ne u president jong ka seng HSPDP u la kyntu ia ki paidbah ba ym dei ban don ia kata ka jingduh jingkyrmen, u la kyntu ruh ia ki paidbah ba kin shim khia ia ka election namar bun sin ki paidbah ki shim sting ia kane ka kam kaba ktah ia ka im ka iap jong ka jaid bynriew. Ka im ka iap jong ka jaidbynriew ka shong eh ha ka synshar khaddar.
Kawei na ki nongrim ba ka seng HSPDP ka dawa ka long ia ka jylla Meghalaya dei ban pynhap hapoh jong ka khyrngit kaba 371 ban iada ia ki riti ki dustur jong ka jaid bynriew ha kaba ia dei bad ka rukomb at khydnew ba shyiap. Ha kane ka sngi u la kyntu ia ki paidbah ba kin ai ka jingkyrshan ia ki seng riewlum ban thaw ia ka sorkar ha u snem 2018.
U Bah Ardrent ha ka jingkren ka jong u la kynthoh jur ruh ia ka jingpyndon kam ia ka bor pisa ha ka por elelction da ki heh spah. U la ong ban lait na ki kam bamsap ki paidbah ki dei ban jied ia ki briew kiba don ia ka nongrim ban shakri ia ka jaidbynriew bad ki paidbah ki dei ban sngewthuh ia kata namar dei ma kib an rai.
Kiwei kiba la kren ha kane ka jingalang paidbah jong ka seng HSPDP ki long ka kong Telina Thangkhiew, MDC, Bah Phlastingwell Pangniang MLA, Bah Martle Mukhim Ex-MLA bad u Bah Defender Pakem. Ha kane ka sngi da ki hajar ngut ki nongkyrshan ka party HSPDP kila ia poi sha kane ka jingialang na kylleng ka Ri Khasi Jiantia.
