Shillong, Nailur 27: Mynta ka sngi u bah Sanbor Shullai MLA jong ka Shillong South na ka party BJP ha ka jingiadon lang u president u bah Shibun Lyngdoh bad ki nongkit kam jong ka party na ka jylla Meghalaya, u la pynbna ba ka party kan pynieng ia u bah Jousha Warjri kum u kyrtong MLA ban ia khun ha kane ka ilekshon shiteng samoi na Shella Konstitwensi.
U Bah Shibun lyngdoh haba kren ha ki lat pathai khubor mynta ka sngi u la iathuh ba ka party kala thoh haduh lai tylli ki shithi sha ki nongialam jong ka party ha Delhi bad ha ka sngi palie kila ai jingbit ban ia khun ia kane ka ilekshon shiteng samoi na ka 26-Shella Konstitwensi kaban long ha ka 21 tarik Risaw jong u bnai ban wan.
La iathuh ba ka daw jong ka jingpynslem ka long ba kum ka National Party ka hap ban peit na baroh ki liang ia ka jinglong ka jaka shuwa ba kan pynbna ia u kyrtong, ha dien ba la dep ban pynbep ia ki jingwad bniah baroh ka shim ia ka kyrteng jong u bah Jousha Warjri ia kaba la pynbna mynta ka sngi.
La iathuh ba ka BJP hapoh jong katei ka konstitwensi ha ka MLA ilekshon ha u snem 2018 u kyrtong jong ka party u la ioh haduh 2500 vote ei ei bad ha ka MP ilekshon kaba u Bah Sanbor Shullai u la ioh haduh 4770 vote bad ha kane ka jingpynrung kyrteng, ki briew na katei ka konstitwensi kiba la pyniasoh sha ka BJP kala kot sha ka 7000 ngut bad ka BJP ka don ka jingkyrmen ba kan jop ha kane ka ilekshon shiteng samoi.
