Shillong, Iaiong 03: Mynta ka sngi ki nongialam ka party Congress u Bah Himalaya Shangpliang uba long u General Secretary jong ka Meghalaya Pradesh Congress Committee (MPCC) u la ong ba ka party Congress ha kane ka kynti ba mynta kan jop ia baroh ar tylli ki seat ha Meghalaya ha kane ka election MP ka ban long ha ka 11 tarik mynta u bnai Iaiong. Ia kane u la kren ha ka jingialap ilekshon ha Mawsynram mynta ka sngi.
Ha kane ka sngi kiba la leit sha Mawsynram ban ialap ilekshon na ka bynta u kyrtong MP jong ka seng Congress nalor u Bah Himalaya Shangpliang ba dei u MLA jong kane ka jaka ki long u Bah Kennedy Khyriem bad ka kong Ampareen Lyngdoh ha ka jingiadon lang ki nongialam jong ka Block Congress na Mawsynram.
Haba thalain ia ka BJP bad UDP u Bah Shangpliang u la ong, To tip ba ki don ka BJP bad ka UDP kaba kila sei ia ki kyrtong jong ki, hynrei kine baroh ar kidei kijuh bad balei nga ong kumta namar ba ka long thik kum ka pisa nar namar ba lada weng noh shilliang kin ym don dur shuh dei namar kata ka daw ka UDP,BJP bad NPP ki long kumjuh lada weng ia kane ka wei ka party kawei kan ym lah ban ieng bad dei hangta kine baroh lai tylli ki seng ki long thik kum kane ka pisa nar namar ba ki dei ban ia synroplang ban ia imlang ba kin ia poi lang ha kata ka juh ka jingthmu ka jong ki kata ban wanrah ia ka jingjop u la ong.
U Bah Shangpliang ha ka jingkren jong u la ong ba u dang wan phai na Garo Hills mynshi sngi paralok bad hangthie ruh ka long kumjuh bad ka jingiakhun hangthie ka long hapdeng ka Congress bad ka NPP hynrei hangne pat ka jingiakhun ka long hapdeng ka Congress bad ka UDP” ong u Bah Shangpliang.
Ka NPP bad ka UDP kidei ka bynta jong ka MDA te namar kata ka daw nga ong “Hangne khlem ka BJP ka MDA kan khyllem bad lada mynta u Conrad u ong ba ngim donkam shuh ia ka BJP ngin ieng hi da lade ngin synshar hi da lade kata ka mut ba lashai lashai ka sorkar u Conrad kala khyllem” ong u Bah Shangpliang.
Nga kwah ban pynshai ha khmat jong phi ba sngewbha da kynmaw ba ha kaba phi leit ban thep ia ka vote, hooid kadei ka party riewlum hynrei kadei ka party kaba la iateh ryngkat bad ka NPP bad ka BJP u la ong. Namar kata ka daw nga kwah ban pynshai ha khmat ki paidbah ba kumba phi, phi la ia don lang ryngkat bad ngi ha ka election MLA ia kaba phi la pynjop ia nga kum uta u kyrtong ka party Congress bad mynta baroh ngi shongsuk shongsain, la ong u Bah Shangpliang.
Shuh shuh u Bah Shangpliang u la ong, kynmaw ba lada lashai kan wan ka CAB katno kan long ka jingeh ia ngi baroh, dang shi taiew mynta u Amit Shah u wan biang ha Guwahati bad u pynkynmaw biang ha ki nong Assam ba kynmaw ka CAB kan wan beit bad ki wanrah ia ka CAB bad lada ngi shong ha ka sorkar shu kynmaw ba ka CAB kala wan lypa u la ong.
“Te kumno ngin leh ia kane, Ngi dei ban pyrkhat bha da kaba ai ia ka bor ha ka party Congress bad dei tang ka party Congress kaba la ieng pyrshah bad kaba la kren pyrshah haduh ba ngin da ioh ban pynsangeh ia ka CAB hapoh Rajya Sabha” u la ong.
U Bah Shangpliang u la ong, Ngin iai ieng ha ka nongrim ka jong ngi khnang ba kane ka CAB kan ym ioh ban iuh kjat ha ka jylla jong ngi, ka party Congress ha kine ki sngi ba la dep lyngba u Rahul Gandhi la pynbna lypa ba lada ka party Congress ka wan ha ka bor ki don shibun ki skhim ban ai jingmyntoi ia ki briew na ki longiing baduk, ki nongrep bad kiwei kiwei de.
