Shillong, Naiwieng 19: Ka jingpyndon kam ia ka bor tyngka ha ka por election MLA ka ban long ha u snem 2018 ha jylla Meghalaya kan duna shibun ban ia nujor bad ki snem kiba la leit noh, la ong u president jong ka seng BJP Meghalaya State Unit u Bah Shibun Lyngdoh.
Ia kane u president jong ka BJP Meghalaya State Unit u la ong ha ka jingdap shisnem jong ka jingkylliang jong ka sorkar BJP ia ka pisa ha ka jingkren bad ki nonghoh khubor ha ka sngi ba ka jingkylliang ia ka pisa ka dap shi snem mynta u bnai.
Ha katei ka sngi u Bah Shibun u la ong ba ha ki snem kiba la dep haba kam pat don kata ka jingkylliang ia ka pisa, haba la poi kine ki bnai ka jingshong shit ka election kala long ha baroh ki constituency ha ka jylla bad khamtam lei ha Ri lum Jaintia.
Kane ka jingkylliang ia ka pisa da ka sorkar BJP ka ba synshar hapoh jong sorkar pdeng kala iarap shibun ban khanglad ia ka bor jong ka tyngka ha ka por Election.
