Shillong, Jymmang 09: Ka Citizenship Forum ha ryngkat lang bad ka HYC Mawsynram Circle ka sngew ban phah biang ia kane ka kyrwoh ban pyntip paidbah sa shisien sha ki Rangbah Shnong lem bad kiwei kiwei ki riew rangbah bad kumjuh ki paidbah jong ka thaiñ Mawsynram kiba ju pyndonkam ia ka light hapoh ka jingkhmih jingpeit jong ka Meghalaya Energy Corporation Limited (MeECL) Mawsynram Division, halor ka jingbymlah ban pynlong ia ka jingialang myn ha ka 4 tarik (Saturday) na ki daw jongka jing jur palat u slap bad ka lyer.
Kumta ha kaba iadei bad katei ka phang na bynta ban lum ia ka jingialang paidbah la pynbeit ban long haka 13 tarik mynta u bnai naduh kapor 12 baje mynsngi hapoh Mawsynram Higher Secondary School. La kyntu ia baroh ki Rangbah lem kumjuh ruh ki nongshong shnong jong ka thaiñ ban shimkhia na bynta kane halor ka jingdonkam kaba kongsan ban ioh ia ka jingshai ha kaba iadei bad ka jingaiti jong ka Meghalaya Power Distribution Corporation Ltd. (MePDCL) ia ka tnad MeECL Mawsynram Division sha ka Feedback Energy Distribution Company Limited (FEDCO).
Khlem da lah ban wanrah ia ki jingpynshai shaki paidbah kaba la pynsah ha ka lyngngoh haduh kine ki sngi wat hadien ba nakaliang jong ka MePDCL ryngkat bad ka FEDCO ki la dep ban iasoi ia ka jingiateh kular ban shimti naduh ka 1 tarik jong u Iaiong (May) 2019 na bynta ban pyniaid ia ka kam khlem da don ka jingpyntip kaba janai sha ki paidbah kiba pyndonkam ia ka light (Electrical Consumers) hapoh katei ka division.
Nakaliang jong u Samla Banshai Marbaniang ha ryngkat bad u Samla Morgan Lyngdoh President HYC Mawsynram Circle ki la kyntu ia ka tnad MePDCL ban ai ia ka jingshai halor kane ka bynta bad nakaliang jongka MePDCL kila kubur ban poilang ha katei ka sngi kumba la pynbeit ban wanrah ia ka jingshai khlem da kheiñ sting ne ñiew beiñ ia ki nong pyndonkam light (Electrical Consumers) hapoh katei ka division khnang ba kan nym wanrah kano kano ka jingkulmar.
Nakaliang jong ka MePDCL ryngkat bad ka FEDCO kin don lang ryngkat ha katei ka sngi ha kaba nakaliang jongki paidbah ruh kilah ban buh kino kino ki jingkylli katkum kaba dei halor katei ka phang kaba iadei bad ka jingaiti sha ki private sector ban pyniaid ia ka jingpyndonkam ia ka light hapoh ka thaiñ Mawsynram Division.
