Shillong, Iaiong 06: U Myntri ba dei peit ia ka tnad ka koit ka khiah u Bah AL Hek u la iathuh ba ia ka Civil Hospital Shillong bad Tura yn pynlong ia ki kum ka “Corona Care Centre”.
Haba kren ha ki lad pathai khubor u myntri u la ong ba hapoh jong ka Civil Hospital Shillong yn buh 200 jingthiah bad ha Tura Civil Hospital yn buh 100 jingthih. Ia mynta ha Shillong Civil Hospital ki dang don tang 40 tylli ki jingthiah bad ha Tura ki don tang 80 jingthiah.
U Myntri u la iathuh ba haduh mynta ka jylla Meghalaya ka dang lait na kane ka jingpang COVID-19, lada jia ba don ia ki nongpang un sumar tang ha Civil Shillong bad ha Civil Tura. Lada jia ba tang u wei u nongpang un don ha Tura lane ha Shillong Civil Hospital baroh ki nongpang yn pynkynriah sha ki Hospital jong ki riewshimet.
U Myntri u la iathuh ba mynta ka sngi u la khot ia ka jingialang jong baroh ki Hospital jong ki riew shimet ban ia kren bad ha kane ka jingiakren kila pdiang ia kane ka jingtynrwa jong ka sorkar bad na ka liang jong ka sorkar kala kren shai ba ia ka jinglut jingsep baroh kan siew ka sorkar lyngba ka MHIS.
Ki Hospital kiba la ia poi sha kane ka jingialang ki long, Nazareth Hospital , Robert Hospital, Woodland Hospital, Bethany Hospital , Children Hospital, BSF Hospital bad ka Army Hospital, kine ki Hospital baroh ki la pdiang ia ka jingtyrwa jong ka sorkar. Kane ka long ka jingpynkreh lada jia kumno kumno ba don kiba ioh ia ka jingpang COVID-19.
U Myntri u la iathuh ba haduh mynta la phah test sha NEIGRIHMS 78 tylli ki test bad baroh ki long “Negative”. Na ka liang jong ki doctor bad ki nongtrei jong ka tnad ka koit ka khiah kila trei shitom ban peitngor bha ha kaba ia dei bad kane ka jingialeh pyrshah ia ka jingpang COVID-19.
