Shillong, Rymphang 21: U vice president jong ka National People’s Party (NPP) u Dr Don War ha ka jingkabas ielshon ka jong u mynta ka sngi ha YMCA Mawkhar na ka bynta u kyrtong MDC ka party u bah PN Syiem u la ong ba ka party Congress ha ka por ba wanrah ia ka CAB hapoh Parliament.
Da kane ka jingmih noh ka jong ki dkhot ka Congress ka kren shai ba kim salia ia ka CAB, ka long kaei kaei kaba sngewlyngoh ban ioh pat ba u Dr Mukul Sangma u ong hana ba dei ka congress kaba pyrshah ia ka CAB. U ne u nongialam ka NPP u la ong ba ia kane ka bynta ymda don kam palat kren namar ki paidbah ki iohi lyngba ki lad pathai khubor khamtam ki television.
Haba phai sha u kyrtong jong ka party u la ong ba kum ka jaidbynriew ka don kam ia u Bah PN Syiem u ba la ieh ha ka sian pyrthei bad u ba shemphang ha kaba ia dei bad ka riti synshar jong ka Sixth Schedule, kum ka jaidbynriew ka don kam ia kine ki briew kiba sngewthuh bad kiba shem phang.
Ha ka jingkren jong u Bah PN Syiem kum u kyrtong u la ong ba wat ia kmen tang ba la ioh ia ka jingpynkylla ha ka Sixth Schedule hynrei dei ban da pule bha ia ka ioh ka ktah ia ki riti dustur jong ka jaidbynriew ia kaba ki long shuwa manshuwa naduh ki por jong ki phareng haduh ba la ioh ia ka jinglaitluid jong ka Ri India kila bat skhem ia la ka jong ka jinglong trai halor ka khyndew ka shyiap.
Haba phai sha ki dulir kiba la ia soi da ki syiem khasi bad ka sorkar pdeng u la ong ba ka sorkar pdeng kam dei ban khien dewthala ia ki, ka dei ban burom katkum ki dulir kiba la ia soi bad ki hima khasi kila poi ban pyniasoh bad ka Ri India. Ha kane ka jingialang kaba la long mynta ka miet da ki spahngut ki briew kila wan ban sngap ia kane ka jingialap ileskhon wat hapdeng ka jingkhriat jong ka miet.
