Ka dawai FORMALIN ha ki Dohkha, La thoh da u Babu Kular Khongjirem

Shillong:Ha kine ki khyndiat taiew ba la dep, ngi iohi ba ka la mih sa kawei pat ka kam ba phylla bym poi pyrkhat (unexpected development) bad kata ka long ka jingshem jong ka sorkar ia ka jingdon ki dawai enjek ha ki dohkha ba bam ki briew da kita ki dawai ba la ju ai enjek ia ka met iap ki briew (deceased) khang ban lait na ka jingsma bad jingpyut jong ka doh jong kata ka met iap da ka jait dawai enjek ba ki khot ka ‘Formalin’.

Kane ka jait dawai enjek ki ong, ka long kaba khlain bor bha (powerful) bad ka long ruh ka dawai kaba don jingma (dangerous) shi katdei eh ia ka koit ka khiah ki briew lada ka ioh rung (entered) ha ka met uba koit ba khiah bha (healthy people). Ki ong ba kane ka jait dawai kan wanrah bun bah ki jait jingpang ba khyllah khyllah ba laiphew jait naduh ki jingpang TB haduh ka jingpang Cancer ruh. Dei na kata ka daw ba ka Sorkar lyngba ka Fishery Department ka la khang shuwa shipor (banned) ia ki jait dohkha ba wan na shabar ha ka state jong ngi khnang ban iada ia ka koit ka khiah ki briew jong ngi ha kane ka liang.

Haba la ai bih ha ka bam ka dih (food items) jong ngi, mano pat ba lah ban lait na ka. Ia ka dohkha lei, ngi ju thied bad ai khnang ia kito ki tymmen ne kito kiba pang tlot pang swai. hynrei mynta pat mar khongpong pynban kumba lehbein ia ki bapli. Kane ka jingpynsangeh thied dohkha ka Sorkar shipor ka la pynkyndit bad pynpeitmat pynban ia ngi ba nangne shakhmat ngi dei ban nang ban ieng hi ha la ki jong ki kjat ha ka Khaii ka pateng, ka ri dohkha dohpnat ym ban shu shaniah na kiba wan na bar na lait. Lada ngi sngewthuh shisha ia kane, kan wan rah shisha ka jingmyntoi bad ki jingkylla ha ka ioh kam ioh jam, ka trei ka ktah ba ngin ia roi shisha parum – pareh para ma ngi ha kane ka ri jong ngi ha ki liang baroh.

Ha kane ka juk jong ngi mynta, ngi iohi ba baroh ki jait jingbam jingdih jong ngi kim lah lait shuh na ka jingdon ki dawai (Chemicals). Kat kaba ngi bam ngi dih naduh ka um ba ngi dih haduh ki jhur ki jhep, ki soh ki pai, u khaw u kba haduh ka doh ka kah la ioh rung lut ki dawai baroh (Chemicals) Naduh ka um, ka lyer, ka khyndew ka shyiap bad ka pyrthei mariang salonsar baroh ki la kylla sniew lut bad kylla bih ruh na ka daw ka jingpyndonkam dawai palat.

Ka um ha sor Shillong ruh ba la tan na Mawphlang water supply Scheme la pynkhuid shuwa da ki dawai (Chemicals) ba kin iap ki khniang jingpang (germs) shuwa ban supply ia ka sha Shillong. Ki um dih ha ki bitor plastic lei (drinking water) kim lah lait satia na ki chemical. Yn nai da ia kren ia kiwei kiwei jait jingdih ba lai phew jait. Dei tang ka um na thyllong mawsiang (natural sources) kaba dei ka um jong ka mariang (Natural Water) kaba lah ban lait na ki dawai (chemical). Ki jhur lei ha ka por bathung ia ki, khlem dawai khlem long artad.

Ki long kiba ma shibun lada ngi bam ia ki. Ki Jait jhur aiu kiba lait na kaba ai dawai bad ber dawai. Kiba kham ibang bad kham itynnad lei lei, kito ki kham ma shuh shuh pynban. Kaba bam ia kum kine ki jait jhur, kan wanrah ki jingpang kpoh ba lai phew jait naduh ka dap lyer (gastric), ka pynhiar, ka prie, jingpang shadem, ka jinghiar ka jingkiew ka BP (Blood Pressure), ka jingpang iap shiliang (Paralysis) bad ka jingpang iap kyllon da ieng kynsan (heart attack). U Khaw ba ngi bam man ka sngi ruh khlem ber dawai um lah ban neh slem bun snem. Ka dud ne ka sha lei yn nai ia kren shuh, kim long hi khlem ki dawai (chemicals).

Mynta pat ki dawai (chemicals) ki rung syndon sa ha ka doh. Ka dohkha na um ruh ka don Formalin. Ki syiar bad sniang na farm ruh ki ong hana, ba la ai enjek ia ki ym tang ba kin lait na ki jait jingpang bapher bapher hynrei ruh ba kin kham heh bad kham san kloi bha. Ki masi ki blang ruh kiba ju ai dud ia ngi man ka sngi ki ai enjek ba kin koit kin khiah bad kham pynmih dud shibun shibun. Haba kumta, hangno ngin ioh ia ki jingbam jingdih jong ngi kaba lait na ki dawai ki dashin (Chemicals).

Ka la dei ka por namarkata, ban ia bud noh ia ki ri kiba shai (Developed countries) ban don noh ar jait ki dukan ha iew. Kawei ka dukan kaba die ia ki jait jingbam bym don dawai (Natural food items) bad kawei pat kaba ber dawai (Chemicals). Lada long ha kata ka dur, bun ki ban ia beh (rush) ban thied ia ki jhur/soh na ki dukan bym pyndonkam dawai wat lada ki kham rem ruh kam pher namar kim don jingktah (side effects) ia ka koit ka khiah bad kin kham im slem ne im tymmen ruh kum ki riew hyndai. Ki jingbam lang ia ki jingbam jingdih kiba don dawai (Chemical) kan ktah kylla ia ka koit ka khiah jong ngi bad ka lah ruh ban khate noh ia ka rta bad jingim jong ngi ki briew ban im shiteng por kumba ka jia ia ki briew ha kine ki juk thymmai jong ngi mynta.

Lada long ha kata ka dur, ka jingbam ba ki bam ha ka por ka sotti juk ki long shuwa man shuwa khlem pyndonkam dawai ki long pynban kiba kham bha bad ki dawai bah ia ka koit ka khiah u briew. U Soso Tham ruh u ngeit ia kane namar u ong; “Ka jingpynim jong kane ka pateng kaba mynta bad ka ban sa wan ka shong eh ha ka jingsngewthuh bad ka jingshem pat ia la ka jong ka Hyndai” U thoh namarkata ia kine ki lain:-

“Kumba ka skei sha la dien trai,

Ka phai kylla khadduh iawai”.

 

What Next?

Recent Articles

Leave a Reply

Submit Comment
*