Shillong, Nailur 13: U Lamphang ka iing dorbar thawain ka jylla u bah Metbah Lyngdoh u la pynbna hapoh ka iing dorbar ban pynpaw ia ka jingsngewsih halor ka jingkhlad noh jong u bah Syntar Klas Sunn MLA jong ka Mawphlang u ba la khlad katba ka iing dorbar ka dang hapdeng ka jingshong dorbar.
U Myntri rangbah ka jylla u Conrad K Sangma haba sdang ia ka jingkren jong u ban pynaw ia ka jingsngewsih kaba khraw ba u MLA jong ka Mawphlang u bah Syntar Klas Sunn un khlad noh haba ka iing dorbar ka shong don hapdeng ka jingshong dorbar.
U Myntri rangbah u la ong haba la wan jingtip hato la juh don ba u MLA un khlad haba ka iing dorbar ka dang don hapdeng ka jingiashong dorbar, ia kane la kylli ruh na u nongialam ka liang pyrshah bad la shem ba kane kan long ka sien kaba nyngkong ba u MLA un khlad ha ka por ba ka iing dorbar ka shong dorbar.
U Myntri Rangbah ka jylla u la ong ba u bah Sunn u long shisha u briew ba don ka jingkit khlieh ha ka kam kaba u trei bad kane kala paw naduh ka por ba u dang don hapoh ka tnad sam um bad ha kane ka jinglong MLA jong u haba u ia kren kam u kren beit ia ka kam thik bad u da bud dien ia ki kam.
Ka jingkhlad jong u ka long ka jingduh kaba khraw ia ka jylla. Na ka liang jong u mytnri rangah ka jylla u phah ia ka khubor sngewlem sha ka kurim ki khunm kiba ha iing ha sem halor kane ka jingkhlad syndet jong u bah Sunn bad duwai ba ai ka mynsien jong u kan ioh ia ka jingjah thiat bymjuh kut.
U nongialam ka liang pyrshah u Dr Mukul Sangma,ha ka jingkren jong u u la ong ba u la ia ithuh ia u naduh u snem 1993 ha ka por ba u long nyngkong kum u MLA bad namar ka jingdon slem jong u ha kane ka kam sain pyrthei u la ia ithuh kham bbha haduh ba un da long kum u MLA mynta.
U Dr Mukul u la pynkynmaw ba kum u Chief Engineer jong ka PHE haba pynkhreh ia ki skhim u juh peit hi da lade ban pynthikna ki kshim kiba la phah kim dei ban wan phai, kata ka jingkit khia jong u ha ka kam kaba u trei, ka jingitynnad jong ka GSWSS ka dei ka jingtrei jong u bah Sunn, hynrei bun sien ki jaka jong ka sorkar ki jot rathai. U Dr Mukul u duwai ba ai ka mynsiem jong u bah Sunn un ioh ia ka jingthait ha bneng.
U Symbut Myntri Rangbah ka jylla u bah Prestone Tynsong u la ong ba kane ka iing dorbar kaba mynta kaba dei jong u snem 2018 ka long kaba sngewsih bha namar ha kine ki lai snem shitemg kila don haduh san ngut ki nongmih khmat kiba la khlad.
U bah Prestone u la iathuh ba u la ia kynduh ia u 12 sngi myshuwa ha ophis kaba u wan ba don kam bad ha kane ka jingiakynduh la kylli hato la dep ban ai Tika ne em bad u la ong bay m pat dep ai, la ong shuh shuh ban sa ai noh hynrei ka wan lap kane ka jingjia kaba sngewsih.
U bah Prestone ba dei peit ruh ia ka tnad ka koit ka khiah u la ong ba u la phah ia u Director ka tnad ka koit ka khiah sha iing u bah S K Sunn bad haba la shim ia ka test ka resolt ka long ba dei COVID-19 positive.
U bah Prestone u la ong ba ka jingkhlad noh jong u ka long ka jingduh kaba khraw ia ka jylla bad ka GSWSS ka long kumba ka long mynta ka dei na ka jingtrei shitom jong u bah Synstar Klas Sunn, kum u ophisar ba du MLA u la noh syniang shibun hapoh ka jylla.
Kiwei ki MLA kiba la kren ha kane banpynpaw ia ka jingsngewsih halor ka jingkhlad jong u bah SK Sunn, ki long u bah Charles Pyngrope, bah Lahkmen Rymbui, bah Process T Sawkmie, bah Reniktone L Tongkhar, bah Himlalaya Shangpliang, bah Hamletson Dohling, bah Mayralborn Syiem.
U Zenith Sangma, ka Miani D. Shira, Saleng A. Sangma, Dasakhiatbha Lamare, George B Lyngdoh, Lazarus Sangma, bah Wailad Shylla, S.G Esmatur Moninin, Adelbert Nongrum, bah A L Hek, ka Ferlin C A Sangma, kong Ampareen Lyngdoh bad u bah Lambor Malngniang.
Ha ka jingkren jong u Lamphang ka iing dorbar u bah Metbah Lyngdoh u la ong ba kane ka jingjia ba sngewsih ba u nongmih khmat paidbah un khlad ha ka por ba ka iing dorbar ka dang don ha pdeng ka jingiashong dorbar ka long ka sien kaba nyngkong, u la pynkynmaw ia ki jingtrei ba u bah Sunn la noh syniang,
Na ka liang jong u Lamphang u phah ia ka khubor sngewlem sha ka kurim, ki khun kiba ha iing ha sem bad u duwai ba ai ka mynsiem jong kan ioh ia ka jingthiat bymjukut ha bneng.
