Shillong, Nailar 31
: Ka Meghalaya State Planning Board Working Group-III, hapoh ka jingpyniaid jong u Co-Chairman, MSPB, Bah John F Kharshiing, ka la pynlong ia ka jingiakynduh lang kaba lai kynta bad ki officer ka tnad ka koit ka khiah bad Family Welfare ban ia kren ia syllok bad ki officer katei ka tnad ki District Program Manager (NHM) East Khasi Hills District.
Ha kane ka sngi la don lang u District ASHA Nodal Officer bad District Community Process Coordinators (DCPC) East Khasi Hills Dist, Block Programme Manager cum Block ASHA Coordinator, ASHA Facilitator, bad khamtam ki nongtreimon sngewbha ki Accredited Social Health Activist (ASHA) bad ki Aganwadi hapoh ka Smit PHC, mynta u bnai hapoh ka AEC Hall, Wah-iing Syiem, Smit, khnang ban ioh buddien ia ki jingtrei kam ki scheme kiba bun kiba la pyniaid lyngba ki ASHA.
Ha katei ka jingialang la ioh ia ka ka jingbatai presentation kaba bniah na ki officer ki Doctor halor ka jingtreikam jong ka tnad ka koit ka khiah shaphang ki scheme National Health Mission, bad ba kumno kitei ki scheme ki iada ia ki paidbah na ki jingpang ki jingshitom kiba bun.
Ha kane ka jingialang la pynpaw ba ha East Khasi hills district na ka jingdon paid kaba 9,29,131 ka district ka la ioh 69.40% ka Jingshim bynta ki paidbah ha ka immunisation program, la shem ba ki don kumba 42 ngut ki longkmie na ka shi lakh kiba khlad ha ka por ba ki kha khun, namar ki jingshitom, la ioh lum ruh ba ka don kumba 32 ngut na man ka 1000 ki khyllung kiba khlad ha ka por kha khun namar ki jingshitom.
Katba hapoh ka East Khasi Hills District ka jingkha khun ka hapoh ki hospital ka kiew suki bha sha ka 78%. Kumba ka long mynta ki don haduh hynniew tylli ki scheme kiba la pyntrei kam da ka sorkar, ka Universal Immunization Programme, Pulse Polio Immunization Programme, JSY, JSSK, RBSK ,RKSK, HBNC, kiba la pyntrei lyngba ka National health Mission, ha ryngkat bad kiwei kiwei ki scheme.
Hadien ba la ioh ia ka jingbatai bniah na ka Dr Miss C Majaw, M&HO ba dei peit ia ka Smit PHC, halor ka jingtreikam jong ka Smit PHC u Bah John F Kharshiing, u la pynpaw ba un sa rah ha ka State Planning Board, ban ai jingmut ba la don kam ban buh ia ka CHC ha ka thain Smit namar katkum ka jingbatai na kiba treikam ka paw ba ka ki paidbah na kylleng ki wan sha katei ka Smit PHC, kaba kdup haduh 30 tylli ki shnong, kynthup 30 ngut ki ASHA, 42 ngut ki Aganwadi Worker, 30 tylli ki Village Health bad Sanitation Committee(VHSNC).
Ka jingtrei shitom jong ka Smit PHC ka paw lyngba ka jingdon OPD haduh 29,358 ha u snem 2015-16, bad haduh 30,184 ha u snem 2016-17, la pyntip ba la don haduh 257(2015-16) bad 210 (2016-17) ngut kiba la kha khun hapoh Smit PHC, wat la katta ki la pynpaw ba ba ka jingkha khun hapoh iing hapoh u pud jong ka Smit PHC ka dang don haduh 153(2015-16); bad 157(2016-17); haba kylli halor kane ka kam ki Dr ki la pynpaw ba kiba bun ki dei kiba wan nabar ka Shnong Smit ban kha khun hapoh Smit PHC bad ki shem ba ki dang bun ki trai shnong hapoh Smit kiba kha hapoh iing.
Ha ka kaiphod la shem ba ki nongthiah pang IPD ki la don 1094(2015-16), bad 682 ngut (2016-17), ha kaba la pynsngew ba la donkam ia ka jaka kaba kham heh ban ioh bun kyrpang ia ki nongpang kiba bun rukom. Halor kane u Bah John F Kharshiing, u la ong ba ka por ka dawa ia ka thain Smit ban ioh ia ka Hospital kaba biang bad kaba kham heh khnang ban iarap ia ki paidbah ka thain Mawkynrew bad Nongkrem baroh kawei. U la kyntu ia ki bor shnong ban ia kren ban ai jaka ban ioh rah ha khmat ki bor Sorkar ban ia kren halor kane ka phang.
Na katei ka jingbatai la pynpaw ba wat lada ki ASHA kim ioh ia ka tulop hynrei na ki program bapher bapher ka tnad Health ki 30 ngut ki ASHA ki la myntoi ka jingioh haduh tyngka 2,91,450 ha u snem (2016-17) bad haduh kine ki sngi na ki kam kiba iaid man ka por ki ASHA ki la ioh tyngka 66,450(2017-18), bad kynthup kiwei kiwei ki jingioh. La pynpaw ba i Kong Lilydora Kharkongor, i la ioh ia ka award Best performing ASHA hapoh ka Mawryngkneng Block ha u snem 2015-16, na ka bynta ka jingtreimon sngewbha ka jong i ha kaba noh synniang ia ka koit ka khiah.
La pynpaw ruh ia ka jingtlot ka jingtrei kam ki katto katne ki VHSNC jong ki Shnong, bad la kyntu ia ki bor Shnong ban shim khia halor kane ka phang kaba donkam bha, katba ka shnong Mawmluh ka la ioh ia ka khusnam kum ka Active VHSNC ha kaba u Chairman, u la shah jied ban mih khmat na ka bynta ka jylla Meghalaya ban leit ia shim bynta ha ka jingialang kaba heh hapoh Delhi.
Haba batai shaphang ka jingeh ban pyntreikam ia ki program kiba bun jong ka tnad Health, ki officer ki Doctor ka tnad Smit PHC ki la pynpaw ki jingeh kaba ki shem haba ki pyntrei kam ia ki program Immunization, ANC, ID, kiwei ki jingsumar jingiada kum ka JSSK, WIFS, RBSK, IPPI, MHIS wat hadien ka jingpyrshang lyngba ki awareness kiba bun.
U Bah John F Kharshiing, Co-Chairman, Meghalaya State Planning Board, u la pynpaw ia ka jingkyndit ban iohsngew ba ha ka WIFS program na ki 22 tylli ki skul 12 tylli ki skul 11 tylli ha ka Nongkrem area kim pdiang ban pynlong ia katei ka jingiada ka jingsumar katba 10 tylli ki skul ki ia shim bynta bad ki ia treilang bad ka tnad heath Smit PHC, bad u la ong ba un sa shim khia halor kane ka phang ban ioh ia ka jingiatreilang ryngkat kitei ki skul bad ka tnad Health bad ka Education Department.
Ki officer ka tnad Health ki la pyntip ba la jied lai tylli ki shnong Lumkynsai, Mawmluh, bad Mawpynthaw ban pynwandur ia ka Village Health Action Plan. Ha katei ka jingialang la pynpaw ha u Bah John F Kharshiing, Co Chairman, ia ka list jong ki khyllung ki khynnah rit kiba ki kmie ki kpa ki la pynsangeh ia ki lad sumar katkum ka jingbthah da ki Doctor ia ki khyllung.
Ki khynnah rit ha ki 30 tylli ki shnong hapoh u pud u sam jong ka Smit PHC, ha kaba ka shnong Mawmuthoh-80, Laitkseh-35, Kynton u Mon-20, Umiew Mawusam-24, Umlynghong-22, Saitdngiem-45, Umphrup Pynshnongkhla-28, Laitkor-1-30, Laitkor-ii -60, Laitkor-III -23, Laitkor IV-15, Wahiingsyiem-17, Lumkynsai-13, Warbah-10, Mawpynthaw-13 ngut ki khyllung kiba la pynsangeh ia ki jingsumar bad kiwei kiwei.
Ha kaba shim bynta ha ka jingiakren ki officer ki Doctor, ASHA, ki Anganwadi Worker, ki Rangbah Shnong, ki la pynpaw ia ka jingkmen bad la ai khublei ia u Bah John F Kharshiing, Co-Chairman, MSPB, uba la lum ia kum katei ka jingialang kaba ym pat juh kham ioh khnang ban sngewthuh ia ka jingeh jong ki paidbah ha kaba iadei bad ka koit ka khia (health) bad ka jingtreikam jong ka Smit PHC.
U Bah John F Kharshiing, u la ai khublei ia baroh kiba la wan ia shim bynta ha katei ka jingialang bad la ai khublei kyrpang ia ki Doctor, ki ASHA, ki Anganwadi Workers kiba u la ong ba ki dei ki paia jong ka tnad Health bad ka long kaba donkam bha ban ioh ia ka jingiasngewthuh jingmut bad ka jingiasyllok khnang ban ioh kyntiew ia ka imlang sahlang hapoh ka thain baroh kawei bad u la kular ban rah ia kitei ki jingeh bad ki jingai jingmut baroh hakhmat ki bor Sorkar.
U Bah John u la kyntu jur ia ki bor Shnong ki bor Balang bapher bapher ban shim khia ban lum ia ki paidbah ha ka koit ka khia namar la shem ba ki paidbah ka thain ki dang donkam bun ka jing pynsngewthuh ha kiba bun ki liang khamtam ha kaba iadei bad ka jingsumar ia ki khyllung.
