Shillong, Risaw 23: Ka jingthmu jong ka seng Congress ka long ban saspon tang ia u Bah PN Syiem marwei na ka party namar ki kam pyrshah seng ka jong u, ha kiba bun ki liang bad kane kala paw ruh ha ki daw kiba la ai da ka party ba kumno la pynsngeh ia ka jinglong dkhot jong u shipor n aka party.
Ki thymmei khubor kiba ia jan bad seng congress ki pynsngew ba kim shym la poi pyrkhat ba saw ngut kiwei pat ki MDC kin resign syndon na ka party, u Bah Antonio War, Bah Hedrian Lyngdoh, Bah Albinus Lyngdoh, Bah Victor Lyngdoh kum ka jingpyrshah ia ka jingshah saspon jong u nongialam jong ki u Bah Pynshngian.
Ka jinghiar resign noh jong ki saw ngut kitei ki saw ngut, kala pynlong ia ka party ba kan shim noh ia ka rai ban wengnoh ia ka jingkyrshan jong ka na kynhun PDF kaba la ialam da u Bah PN Syiem, ha kaba lai ngut ki EM jong ka seng Congress kila hap ban resign noh na ka kam.
Ka jingmih noh jong ki MDC Congress na ka PDF ka dei ka jingbthah jong ka MPCC kumba kala paw ha ka shithi kaba la ai jong u nongialam jong ka Congress hapoh KHADC u Bah Manstudy Nongrem, u ba dei ruh u Chairman jong ka iing dorbar.
Na ka liang jong u CEM u Bah PN Syiem u la dep kren shai ba yn sa shim ia ka rai la shai ka sngi nyngkong ha kaba ia dei bad ka jinghiar shuki jong ki lai ngut ki EM, shuwa ban phah ia ki shithi resign ka jong ka sha u Lat ka jylla bad ban thung bujli da kiwei ha ka jaka jong ki.
