Shillong, Jylliew 02: Ka kynhun ki Nongniah Taksi kamai-ka East Khasi Hills Local Taxi Welfare Association (EKHLTWA) mynta ka sngi, ka la byrngem ban ujor da ka mukotduma sha Iingkashari Meghalaya High Court pyrshah ia ka hukum jong ka Deputy Commissioner (DC) ka East Khasi Hills.
Kane ka jingbyrngem ka kynhun ki nongniah kali ka mih hadien ba ka la don ka jingpynmih order na ka Deputy Commissioner ban pyntreikam noh da ka Odd/Even number ia ki kali kamai ki ban kamai ha Nongbah Shillong kaban sa treikam naduh ka 5 tarik mynta u bnai jylliew.
Kane kan treikam tang ia ki kali kamai kiba iaid kamai sha Khyndai Lad bad sha Motphran haba buh kyndon ruh ba baroh ki kali ki dei ban dei kiba pyndait ia ki HSRP.
Shuwa kane, ki Nongniah Taxi ki la pynlong ia ka jingialang paidbah ha Madan Malki ban pynrem jur ia ka hukum ba la pynmih ka Deputy Commissioner, la ong ba kane ka dei ka jingpyrshang ban knieh noh ia ka jakpoh jong kiba im da ka ba kamai kali.
Ki Nongniah taxi ki la iatur paidbah sha ka Ophis ka Deputy Commissioner ban dawa ba kane ka khliehduh ka District, ka dei ban pynduh pyndam noh ia kane ka order.
U bah Wandonbok Jyrwa uba dei u President ka EKHLTWA Haba kren sha ki lad pathai khubor hadien ka jingialang bad ka Deputy Commissioner, ula ong ba ha ka jingialang bad ka DC.
Baroh ki nongniah taxi ki la pynpaw ba ki pyrshah jur ia ka order ba la pynmih halor ban pyntreikam Odd/Even ia ki kali kamai ha Shillong, la pynpaw ruh kum ki Nongniah taxi da lei lei ruh kin ym pdiang satia ia kane ka hukum.
U bah Wandonbok u la bynrap da kab ong, kum ki nongniah kali ki ba kamai da ka ba niah Taksi, kin nym burom satia ia kane ka hukum jong ka Deputy Commissioner, ba ki Nongniah Taxi kin iai kamai kumba ju kamai ha kine ki sngi ban wan bad lada mih kano kano ka kynrum kynram, ka DC kan hap ban bah khlieh.
U bah Wandonbok u la iathuh ba ka DC ka pynpaw ba kam lah shuh ban weng ia ka order namar kane ka order ka dei ruh kum shi bynta ban pyntreikam ia ka jingbthah ka Iingkashari Meghalaya High Court .
U la iathuh ba ka EKHLTWA ka la kren shai ha khmat ka DC ba naka liang ki Nongniah kali kamai ruh kin sa file da ka Affidavit sha ingkashari pyrshah ia kane ka hukum.
