Shillong, Naiwieng 29: Ka Mawlai Constituency Committee jong ka KHNAM ka pynpaw ka jingsngew lyngoh kaba khraw halor ka jingkam trai jong u MLA ka seng Bah Adelbert Nongrum ia ka seng bad ka jingpynbna khlem nongrim ba u la dei u President ba thymmai jong ka seng khlem da pynlong ia ka jingialang paidbah kaba dei ka rukom kat kum ka riti treikam.
Kane ka pynpaw ia ka jingrhah bor bad ka jingleh donbor jong u MLA da kaba uihroit ia ka sur jong ki constituency kiba bun, Ha ka jingshisha kum ki nongtrei jong ka party ki khmihlynti ba un ia khun bad iakren halor ki mat kiba la ktah iaki paidbah khamtam eh ka ILP kaba dei ka mat kaba ha khmat eh jong ka seng bad ka mat them metor kaba hap hapoh u pud u sam jong ka konstitwensi kaba u mih khmat hynrei u la pynthohbria ia ka seng.
Kumta ka party KHNAM jong ka ka Mawlai Constituency Committee ryngkat bad ka Mawlai Youth Wing bad Women Wing kila la ia shim bynta ha ka jingialang paidbah ka seng kaba la long ha ka 28thKyllalyngkot 2017 ha Mawlai Polytechnic ha kaba la jied ia ki nongkitkam ba halor eh jong ka seng katkum ka riti treikam bad la pynskhem ia u bah Pynbadborthiaw Saibonkum u president.
Ha katei ka jingialang paidbah la jiet ruh ryngkat bad kiwei de ki nongialam jong ka seng kumta kim lah ban pdiang ia kiwei pat ki nongialam kiba kam jubor ia lade kum ki nongialam ha madan madiah khlem da iaid bad burom ia ka riti treikam jong ka seng.
Ka Election Commission jong ka Ri India kam don bor ban jied ia u President ka seng bad ki nongkitkam jong ka CEC hynrei kadei ka bor jong ka dei da ka jingialang paidbah jong ka party bad ka long kaba sngewsih ia kane ka jingleh jong u MLA, la ong u bah S. Mylliemumlong Secretary jong ka KHNAM Mawlai Konstitwensi ha ka kyrwoh kaba la phah mynta ka sngi.
