ka election shiteng samoi kan sa wan biang ha Ranikor constituency hapoh 6 bnai khlem pep Da Babu Kular Khongjirem

Hadien ka jingkhlad noh i bah Nassar Marwein, MDC ka Langrin, ka election shiteng samoi kan sa wan biang ha Ranikor constituency hapoh 6 bnai khlem pep. Ha kane ka bye election kan kham jwat ia ki political party kiba iadei paralok ha ka sorkar MDA ba la ialam da ka NPP.  Ha kine ki bye election  ba la dep, ka NPP ka la ai jingkyrshan sngewbha ia ki candidate jong ka UDP.

Kawei ka dei ha ka MP election na Shillong parliamentary constituency bad kawei pat ka dei ha ka MLA bye election na Shella constituency. Ka MP election ba la pynieng da i Dr Jemino Mawthoh ka UDP kum u common candidate ka sorkar MDA, u la shah rem kput ha i Bah Vincent Pala, u candidate ka Congress party katba u khun I (l) Dr Donkupar Roy pat, u bah Baljied kupar Synrem u la jop kput na Shella bye election dang shen.

Hynrei, kiei kiei ki ju pynjia ha ka jinglong ka sain hima sima. Ha kane ka sien ka UDP bad ka NPP kan iakynduh mawsiang ban pynialeh common candidate biang. Ka jingshah rem u Martin M Dango ha ka bye election jong ka Ranikor ha i bah Pius Marwein jong ka UDP kan buh jingeh lypa ia kine ki ar tylli ki party ba ju ia long paralok. Lada ialeh hi u Dango, kan buh jingeh lypa ia u candidate ka UDP ban jop suk ia ka bye election MDC na katei ka constituency. Ka UDP ka dei ban ioh ia u candidate uba biang ban pynliem ia u Dango, lym kumta ka lah ban duh ei shi seat ka seat MDC.

Ka UDP ka lah ban phah ialeh da ki khun ne kiba ha ing ha sem jong i bah Nassar kumba long ha Shella bye election khnang ban ioh biang ki vote sngew synei sa mynta ka sien. Lada ka UDP ka kyrpad biang ia ka NPP sa mynta ka sien, kan kohnguh ne em ka NPP ban kyrshan biang ia u candidate MDC ha ka bye election na Ranikor?.

Ka NPP, lada ka kwah jop kan pynialeh beit da u Martin M Dango bad kan sa kyrpad kylla pat sa ia ka UDP kum ka nongkylliang ban kyrshan noh ka NPP ha kane ka sien namar nalor ba ka kyrshan ar sien kynthih ha ka MP bad bye election na Shella, kan pynshong nongrim ruh ba dei ban ioh mar uwei u nongmihkhmat na Ranikor. Ka UDP ka la don lypa u bah Pius Marwein kum u MLA bad khnang ban kham skhem shuh ka ka jingiadei paralok para ma ki ha ka sorkar. Kan pan jingkyrshan kylliang noh na ka UDP ba kan kyrshan noh mynta ka sien ia u candidate ka NPP. Lada u Dango u ialeh shisha na ka NPP bad ka UDP ka kyrshan lang ia u, la tikna lypa ba ka NPP kan ioh beit ban rah ia ka thong jong ka jingjop ia ha bye MDC election na kane ka constituency.

Hynrei, ha kane ka constituency namar ba baroh ar tylli ki party ki ia khlain lang, ka jingiapynbeit jong kine ki ar tylli ki party kan jwat shibun ha kane ka sien. Ki lah ban iakhun lang kumba long ka MLA bye election mynshem snem. Lada bakla tiak, ka lah ban ktah pynban ruh ia ka jingiadei ha ka sorkar MDA. Aiu ki nongialam bastad jong kine ki ar party kin ia kren ia pynbeit bad shim ia ka rai, ki paidbah ka Langrin constituency bad ki paidbah ka ri khasi-Jaintia jong ngi ki ia ap kmih lynti tad haduh  ba ka State Election Commission kan sa pynbna ia ka tarik bye election na katei ka constituency.

What Next?

Recent Articles

Leave a Reply

Submit Comment

*