Shillong Nohprah 20: Ka seng Federation of Khasi Jaintia and Garo People (FKJGP) mynta ka sngi kala shim ia ka rai ban khot ia baroh ki nongialam seng sain pyrthei ha u bnai Kyllalyngkot 2018 ban pan ia ka jingkular na ki ba kin weng ia ki jingeh jong ka jylla ha kaba ia dei bad ka jingrung kyrthep jong ki bar jylla.
Ia kane ka rai la shim ha ka jingialang jong ka Central Executive Council (CEC) na ka liang jong u Bah Wellbirth Rani ula ong ba ka seng kan pynlong ia ka Political Awareness ha kaba kan khot ia baroh ki nongialam jong ki seng saiñ pyrthei ba kin pynshai ha khmat jong u paidbah iaki mat treikam jongki ha ryngkat bad ka kular ban pyntreikam ia ki haba kila wan ha ka bor synshar ha u 2018”.
Ha kane ka jingialang kaba ka seng kan khot ia ki seng sain pyrthei na ka liang jong ka FKJGP kan rah iaka mat ha kaba iadei bad ka jingbym iohkam iohjam ki samla ka seng kan sa buddien ia kine ki jingkular jong kitei ki seng sain pyrthei.
U Bah Rani ula ong ruh ba ka seng kan pynthikna ba ki seng saiñ pyrthei kidei ban pyntreikam ia kitei ki jingkular kiba kila khlei ha khmat jong u paidbah hashwa ba kin leit sha ka elekshon MLA 2018 bad kam dei ban kut tang ha ki kular elekshon ne mat treikam ha ryngkat bad ka byrngem ba ka seng kan leh da kaba tyngeh lada kine ki seng saiñ pyrthei kiba wan ha ka bor kim leh eiei iala ki jingkular.
U Bah Rani u la ong ba ka Congress kala pulom ha kaban pynurlong iaka jingkular ka jongka ban aikam da ki lak ngut ki samla kumba kala kular ha ka manifesto jongka ha ka elekshon bala dep.
“Ka sorkar kam dei ban shimkabu ne lehkai iaka lawei jongki samla da kaba shu thungkam ha ka kontrak hynrei kadei ban thungkam pura noh ha ki kam kiba lait ha ki tnad bapher bapher da ki samla kiba khlem kam khlem jam” ong u Bah Rani.
Nalor kane ula ong ruh ba ka seng kan sa bishar bniah iaka Memorandum of Understanding (MOU) na a bynta ban shna ia ka Shillong Medical College ha ka Private Public Partnership (PPP) mode, la kan ai jingmyntoi ne em iaka jylla la kadei ha ka bhah pule bad haka iohkam iohjam.
U ne u nongialam jong ka seng FKJGP ula ong ruh ba ka seng kaba dei ka seng kaba iadonlang ha ki 13 tylli ki sengbhalang, kan dawa na ka sorkar ba kadei ban pyntreikam noh mardor ia ki lad jingiada ban pyrkhing iaka rung ka mih jong ki bar jylla bad ki mynder ri ha kane ka jylla bad kala kynthoh jur iaka jingpynsuki ka sorkar jylla ban shna iaki Entry/Exit Point ha kylleng ki bynta jong ka jylla.
