Shillong, Lber 08: Ka FKJGP Seng Kmie ha ka Central Executive Committee (CEC) kaba la long mynta ka sngi i.e. 8th March 2017 ha Office Treikam jong ka Seng kala iatai sani bha ia kiba bun ki issues jong ka Seng bad khamtam eh ia ki mat kiba ktah ia ka iap ka im jong ka Jaitbynriew ha kaba la shim ruh ia ki rai kumne harum:
Ha kaba iadei bad ka Shithi bala phah da ka Uranium Corporation Of India Ltd (UCIL) sha ka seng ha ka 1st March 2017, No:UCIL/SHG/ADMN/2011/726 ba kan don ka jingialang ha ka 16th March 2017 ha Pinewood Hotel ban iamir jingmut halor ka Kylleng Pyndengsohiong, Mawthabah Uranium Project, Ka CEC kala rai ba kan ym leit satia ban iashimbynta ha katei ka jingialang namar ba ka Seng ka Iengskhem ba Horkit Hordang kan ym ailad satia ban khlong ia u Uranium na kane ka Bri u Hynniewtrep, Ka Seng kam kwah satia ban shu pyn bijai ei iaka por kumta lyngba kane ka Kyrwoh ka kwah ban phah ia ka Khubor kaba shai sha ka UCIL ba ka FKJGP hi ka ong “EM IA U URANIUM”.
Ha kaba iadei pat bad ka jingkular jong ka KHADC ban shna ia ki Surok sha ki bynta ba don u Uranium ha kaba la mang pisa haduh 25 Klur, Ka Seng kala shaniah ia kane ka kam ha Ki Nongialam jong ka South West Khasi Hills District Unit ban leh ia kaba donkam.
Ka Seng kala iatai sani bha ruh da ka jing sngewkhia halor ka jing kiew sted jong ki Kam Thombor pyrshah ia ki Kynthei bad Khyllung Khynnah (Crime against Women), Ka CEC ka pynrem jur ia ki Nongleh Bymman bad ha kajuh ka por ka dawa na ka Sorkar Jylla ba dei ban don noh ka Ka Fast Track Court lane ka Special Court kaba iadei beit thik tang ia kane ka bynta khnang ban lah ban pynkloi ia ka jing tohkit bad ruh ban ai ka jing pynsaja kaba tyngeh ia baroh kiba donkti ka kitei ki Kam Be-Ain.
Ha kaba iadei bad ki Issues ban khanglad ia ka jing wanrung kyrthep jong ki Mynder ha ki rukom kiba pher bapher, ka CEC kala bthah bad aibor sha baroh ki Districts, Circle & Unit jong ka Seng ba kin long kiba peitngor bad ban trei shitom halor kane ka bynta.
Ka CEC kala aibor pura ia ka Education Cell jong ka Seng ban Shimkhia ia kiba bun ki Jingeh jong ki Samla Pule bad kumjuh ruh buddien ia ka jing pyn slem jong ka Sorkar Jylla ban pynurlong ia ka Education Policy.
Ka CEC kala rai ban sdang noh ia ka jingialap Paidbah halor ka Socio-Economic Movement mynta u Bnai lyngba ki Programme kiba pher bapher ha Kylleng ki bynta jong ka Rilum Khasi, Jaintia & Garo ha kaba yn sdang shwa na Nongbah Shillong ha ka 28th March 2017.
