Ka GSMC kam pat don kata ka jingdro ia ka map jong ka Garoland haduh mynta: Nikman

Shillong, Nohprah 05: U Sharman jong ka Garo State Movement Committee (GSMC) u Nikman Ch Marak, u la ong ba ka jingwan jong ki sha Shillong mynta ka sngi ban pynlong ia kane ka jingialang paidbah hapoh ka nongbah jong ka jylla, ka long ban pynpaw sha ka pyrthei ba ki paidbah Garo kila don kam ban ioh iala ka jong ka jylla ka Garoland.

U Nikman u la ong ba ha kane ka sngi baroh ki seng bhalang na Garo Hills kila ia wan ban ia shim bynta ha kane ka jingpynpaw jong ki ia ka jingdawa ban ioh ia ka Garoland da kaba jai jai katkum ka riti synshar paidbah jong ka Ri India. La ong ba kane ka jingdawa kam dei kaba thymmai hynrei ka dei kaba la slem bah kaba ki paidbah Garo kila dawa.

Kane ka jingdawa Garoland kala long naduh shuwa ban ioh ia ka jylla Meghalaya, ka jingdawa ka khiim bad ka jah noh dei ha u snem 2012 ba la pynim biang ia kane ka jingdawa da ki seng bhalang ha ka kyrteng jong ka GSMC kaban ia lam ia ka jingdawa Garoland.

Na ka liang jong ki seng sain pyrthei, da kaba burom ia ki ar ngut ki nongialam ka jylla, u Bah Hopingstone Lyngdoh jong ka seng HSPDP bad u Clifford R Marak jong ka GNC baroh ngut kiba la bam kwai ha dwar jong u blei kila ia trei la kam jong ki ban dawa ban ioh la ka jong ka jylla hynrei kam shym la urlong.

U la ong da kaba burom ia ki Khasi bad ki Jiantia, ki Garo ki iapher na ki, ha ka ktien ka thylliej, ka Riti ka Dustur bad ha baroh ki liang, kumta kala dei ban ia ioh noh la ka jong ka jylla bad ha ka juh ka por ban kiew ha ka ioh ka kot bad ha ki liang baroh.

Halor ka jingmih ha ki lad pathai khubor ia ka map ha kaba ia dei bad ka jingdawa Garoland na ka liang jong u sharman jong ka GSMC, u la ong shai ba haduh mynta kim don ia kano kano ka map kaba kila dro, ka map kaba la mih haki lad pathai khubor kam dei kaba la dro na ka GSMC.

Ha kane ka sngi da ki spah ngut ki paidbah Garo kila ia wan sha Shillong na Garo Hills ban ia shim bynta ha kane ka jingpynsngew sha ka pyrthei ba ki dawa ia la ka jong ka Garoland. Ki dawa ba ka sorkar pdeng bad ka sorkar jylla ka dei ban shim noh ia ka rai halor kane ka jingdawa jong ki.

Ha kane ka sngi ki la ia pyrta “ kin nym shong thait kaba ym pat ioh ia ka Garoland”, ban ioh ia ka Garoland ka dei ka hok nongkynti jong ki. Ha kane ka sngi kiba la wan ban ia shim bynta ki long ki long kmie ki long kpa bad ki samla na Garo Hills.

What Next?

Recent Articles

Leave a Reply

Submit Comment

*