Shillong, Naiwieng 12: Ka Hynnñewtrep Border Disputed Redressal Forum ka pynrem jur iaka sorkar Assam bad iaka Karbi Anglong Autonomous Council (KAAC) namar ka jinglehbor jong ka ban tei iaka madan ialehkai haka shnong Umlaper kaba don hapoh Raid Nangtung ( Block-11) kaba dang don hapdeng ka jingiakam trai kylliang hapdeng ka sorkar Assam bad Meghalaya.
Ka Forum ka pynpaw ka jing sngewsih bad ka jingsngewrem namar ka jingpyndem tdong jong ka sorkar Meghalaya haka ba ka sorkar Assam ka ioh ban leh donbor iaki jaka kiba dangdon hapdeng ka jingia khajia pud.
Kum ban shu pynkynmaw haka snem 1994 – 95 ka sorkar Assam ka pynkynriah iaka Battalion Out Post jong ka naka shnong Umpawiang shaka shnong Khanduli (Lumpyrdi) wat hapdeng ka jingpyrshah jur jong ki pait nongshong kane ka thaiñ ruh ka Assam ka dangioh ban buh iakane ka Outpost kaba laneh lasah haduh mynta .
Nangta ka buh biang sa haka shnong Mokoiram kaba jngai tang kumba san lane hynriew kilometers nakane ka Outpost ha Khanduli. Nangta haka snem 2020 wat hapdeng ka jingpyrshah jur jong ki pait nongshong shnong jong ka shnong Lapangap ruh ka Assam kala ioh ban shna pyndep ïaka surok ha Pdeiñsharieñ kaba danghap hapoh u pud u sam jong ka shnong Lapangap.
Mynta u snem 2021 ruh ka sorkar Assam kala ioh ban plie iaka Police Out Post sa haka shnong Saba . Lyngba kine ki Out Posts ka Assam kala ioh ban ker kut iabaroh ki jaka puta jong ka Meghalaya kiba don haki thaiñ khappud kiba dang don hapdeng ka jingiakren ia pynbeit.
Haka jingiadei bad ka Block-11 , Ka sorkar Assam lyngba ka Karbi Anglong Autonomous Council (KAAC) kala pyni bor bah hapoh kine ki.arsnem , khamtam hapoh une u snem hakaba kala don ka jingpyrshang jong ki ar sorkar ban pynbeit ia u pud u sam .
Kat kum ka hingtip baka Forum ka la ioh te haka 15-8-2021 haka sngi Independence Day u CEM jong ka Karbi Anglong Autonomous Council u Tuliram Ronghang u la pynbna paitbah baka Umlaper kadei kawei naki sor (Town ) jong ka West Karbi Anglong District.
Haka 23-8-2021 arngut ki samla Khasi kila shah shoh haki pulit Assam haka ne ka shnong. Bad haka 25-8-2021 ki pulit jongka Mawlasnai kila shah ther haki pulit jongka Ulukunchi Assam.
Ki bor District jongka West Karbi Anglong bad Ribhoi District kila pynlong ïaka jingiakren ban wanrah ïaka shongsuk shongsain hakane ka thaiñ haka 26-8-2021 bad hakane ka jingïalang ki ar DC’s kila mynjur ban ym pyntrei kam shuh shwa iakino kino ki skim pynroi lakidei naka sorkar Assam ne Meghalaya kat bym pat ia pynbeit para DC da kumwei pat .
Bad la pynjari ruh iaka 144 Crpc haki thaiñ Umlaper ba ymdei ban iakiew na Assam ne iahiar na Meghalaya shaka ne ka shnong . Hynrei la paw tyngkreiñ baka Assam kam patiaw ei ei ruh em halor kane.
La ioh jingtip ruh ba haka 27 .8. 2021 u DIG jong ka Assam bad u SP jong ka West Karbi Anglong kila wan hiar hakane ka shnong ha ryngkat bad ki sengbhalang na Karbi Anglong, la ioh hingtip ruh ba u SP jong ka West Karbi Anglong u sah haduh shiphew sngi nangne haka ne ka thaiñ bad leit pynlong jingïalang jan sha baroh ki shong kiba don hakane ka thaiñ. Haka 30. 8. 2021 pat u MLA jong ka Baithalangso u Rupsingh Teron ula hiar shakane ka shnong .
Lyngba kine ki jingjia , ngi ioh i tyngkreiñ iaki jingbym kheiñ snep jong ka Assam iaka sorkar Meghalaya . Ha khmat jong ka sorkar Assam ki heh ki haiñ jong ka sorkar Meghalaya ki pyndem tdong kum ki ksew rem iadait . Ki pulit Meghalaya ki nangban pynngat kyndon bad ban kem tang iaki briew lajong katba ia u nongshun pat kim nang leh ei ei m kilong shisha kum u Thlen Khasi ba bam tang iaka snam Khasi .
Ka Forum ka dawa iaka sorkar Meghalaya baka dei ban shimkhia mardor iakine ka kam . Bad ban khang khyrdep shi syndon iakane ka madan ialehkai bad ymdei ban pyndonkam iaka tad ynda pynbeit bad pyntikna shwa ia u pud u sam.
Ka Forum kyntu ruh iaki pait nongshong shnong jong ka Meghalaya khamtam kiba shong basah haki thaiñ khappud bakim dei ban long ki nongbam armaloi bad ruh ban tieng kohtympan iaki jingpyntieng jong ka sorkar Assam . Hynrei ngi dei banlong kiba shlur bad kiba ieng hala ka jong ka nongrim kumba ngi long ki trai jaka trai muluk jong kine ki thaiñ naduh hyndai hynthai kulong kumah.
Ka seng ka ai khublei bad sngewtynnad ban iohi ia U MDC ka Mawhati uba la mih bad shimkhiah ia kane ka kam haba peit ia kiba bun ki nongmihkhmat ki kren kam pud tang ha rynsan election hynrei unda la jop ki long kiba ym don ktien ban kren.
