Ka “Heritage Walk” ban pyni ba ka Shillong ka don ia ki jingtei ba don ia ki khana: Cornad

Shillong, Kyllalyngkot 24: Kum shibynta ban rakhe ia ka jingdap 48 snem jong ka jylla mynta ka sngi u myntri rangbah ka jylla u Conrad K Sangma u la plie ia ka “Heritage Walk” kaba la sdang na Nan Polok ia kaba la pyniaid da ka tnad jngohkai pyrthei.

U myntri rangbah u la ai ka jingiaroh ia ka tnad jngohkai pyrthei kaba lah ban leh ia kane, namar ka jingthmu jong kane ka long ban pyni ba ha kane ka nongbah Shillong ki don ki jingtei kiba la palat ia ka shispah snem bad kiba don la ka jong ka khana ha dien jong ki, hynrei ia kine ym shym la lah ban leh ba ki briew kin tip.

Ka jingthmu jong kane ka long ban pyni sha ka pyrthei khamtam ia ki nongwan jngohkai pyrthei ba kin tip ia kaei kaba don hapoh jong ka nongbah Shillong kum ka Nan Polo ka don la ka jong ka khana bad kum juh kiwei kiwei ruh ki don la ka jong ka khana jong ki.

Kane ka long ka jingpyrshang ban shim ia kine ki jingtei kiba kordor  kiba ka nongbah Shillong ka don, kane ka dei ka jingthmu jong kane ka “Heritage Walk” bad kane kan long ruh kum ka jingplie lat ia ki samla ba kin long kum ki nongialam ia ki nongjngohkai pyrthei, la ong u mytnri rangbah ka jylla.

U Myntri rangbah u la ong ba kane kan long ka jingsdang, nangne sha khmat kin dang don shuh kiba kum kine ki jingthoh ha kaba ia dei bad kiwei kiwei ki jaka ha kane ka jylla Meghalaya.

Haba ia dei bad ka Nan Polok la ong ba kan nym dei tang na ka tand khlaw ban pynneh pynsah ia hynrei kan don ka jingpynbah shuh shuh ia kane ka Nan Polok da kaba thung ia ki dieng kiba kyrpang khnang ba ki briew kiba wan kin iohi.

Haba ia dei bad ka nur um kaba la ring um mynshuwa na ka wah Umsherpi  na Dhankheti sha Nan Polok kaba la duh mynta u myntri rangbah u la ong ba un sa peit ba lada da lah ban pynim biang ia kane ka nala kum shibynta ban pynsah nama ia ka Nan Polok.

Ha kane ka sngi la don lang u myntri ka tnad khlaw u Bah Lahkmen Rymbui, Chief secretary u MS Roa, Director ka tnad jngohkai pyrthei Bah C V D Diengoh bad kiwei kiwei ki heh sorkar sorkar.

 

What Next?

Recent Articles

Leave a Reply

Submit Comment

*