Shillong, Nailar 18: Ka Hill Farmers Union (HFU) hapoh ka jingialam jong u President ka sengkmie bad kumjuh ruh u General Secretary ki la nang pyniar shuh shuh ia ki shnat treikam jong ka Hill Farmers Union ha kylleng ka jylla.
Dangshen u President jong ka HFU u Bah Commander Shangpliang ha ryngkat ka jingsynran lang jong u General Secretary bah Allfondbirth Kharsyntiew ki la leit ban pynskhem ia ki nongkitkam jong ka Umiew, hajan Smit. Hangne ruh ki nongrep ki la shim ia ka rai ban iatreilang bad ka HFU na ka bynta ban pynpaw ia ki jingeh ha ki bor sorkar bad kiwei kiwei.
Dangshen ka seng ka la leit ruh ban pynlong ia ka jingialang ha Pynursla ha kaba da ki spah ngut ki nongrep ki la wan ban iashim bynta. Ha kane ka sngi la jied ia ki convener bad ha ka 24 tarik mynta u bnai kin sa jied ia ki nongkitkam kiba pura jong ka HFU.
U bah Commander u la iathuh ba ka seng ka kwah ban pynrung dkhot kumba 1 lak ngut khnang ban pyniatylli ia ki nongrep bad kan suk ban iakren ia kino kino ki jingeh kiba ki nongrep ki iakynduh ha ka jylla.
Na ka liang jong u President jong ka HFU Nongthliew Circle U Bah Khrawkupar Lawryniang u la leit ban pynskhem ia ki unit ha ki ar tylli ki shnong kata ha ka shnong Mawiong bad kawei pat ha Mawiong Mawria.
Ha kane ka shnong ki nongrep hadien ba la ioh ia ka jingpynshai na u bah Khrawkupar ki la ong pynpaw ba ki kloi ban iatreilang na ka bynta ban iakhun ia kiba bun ki jingeh bad ki hok jong ki nongrep kaba ki dei ban ioh.
U Bah Commander Shangpliang President jong ka sengkmie u la iathuh ba ha ka 24 tarik mynta u bnai ka seng kan leit ban pynlong ia ka jingialang paidbah ha Jengjal West Garo Hill bad ha katei ka sngi hadien ba la ioh ia ka jingpynshai kin sa form ruh ia ka HFU West Garo Hill Unit.
