Shillong, Lber 09: Haka sienjam kaba nyngkong bad kaba thymmai jong kane ka Sorkar MDA kaba lamkhmat daka NPP la iohi ba ka lah buhthong ba hapoh 5snem Meghalaya kan laitnoh naki kam lehnoh, kine ki dei ki juh ki kyntien, ki juh ki khana, ki juh ki jingkular bad kijuh ki buit treikam kiba u Mukul Sangma u lah pyndonkam mynba u dang long u myntri rangbah.
Ha ka kyrwoh kaba la phah mynta ka sngi da u bah Saiñkupar Nongtraw Publicity Secretary, HNLC ka seng lehnoh ba la shah niew beain u la ong ba ka jingkren ka dei bad kaei kaba jia hadien ka jingkut jong kawei ka san snem hadien kawei pat, ka long ba kine ki khliehduh jong ka Sorkar jylla ki ialeh ban pynjaw kai shibun ka snam na bynta ki thma pohiing, haka jaka ba kin pynmih shibun ka syep na bynta ka jingsuk kaba long markhongpong bad ka jingangnud ki paidbah bad ka HNLC.
Kumba long haki 10 snem balah leit ka Sorkar MUA hapoh ka jingialam u Mukul Sangma ka lah shu pynbunkam kai ialade ban iakren tang bad ki sengthymmai kiba dei ki sengtit ha rilum Garo ki bym shym don iaka nongrim kaba skhem ha kaba ki riew sain hima sima ruh ki shu leh klet iaka jingsuk ha rilum Khasi- Jaintia ba kan wanphai lah kumba 30 snem tam mynta.
Ka long kaei kaei kaba sngew shutia ba u James K Sangma u kwah ba ki Seng kiengatiar kin wan iakren khlem ka jingbuh kyndon katba naka liang ka sorkar pat ka kloi ban buh kyndon kata ban wan pyndem shuwa bad sa iakren hadien,hangne ka kdew shai ba ka nongrim ba ki ieng kam shai,
ka long thik kumba ki ong iaki nongri dohkha, bret shuwa iaki dohkha haka pung, sa pyndap pat iaka um lada sngewdonkam, ka mut ba phi don iaki hok tang hapoh kita ki kyndon kiba ki buh maki hynrei maphi kum u riewshimet ne kum ka kynhun ne ka Jaidbynriew phim lah ban shimrai kylluid na lade.
Kane kam dei ka lynti ban pyrta iaka Jingsuk, lada ka jingsuk ka don kyndon kata kam dei ka Jingsuk bashisha. Ka lawei jong ka jingsuk kam shong haki kti jong u politician marwei hynrei ka shongeh haka sur bad ki tyrpeng jong ki kynhun paidbah bad ki nongshong shnong baroh kiba angnud ia ka jingsuk ba shisha ba kan wanphai.
Haka thup buh jingthoh jong ka HNLC kaba dei jong u snem 2004,u Purno A Sangma u lah khot sngewbha iaki Nongialam ka HNLC ban leit iakynduh ia u ha Kolkata na bynta ban maitphang iaka jingiakren iasuk bad ka Sorkar India Hynrei jia ryngkhat ba ha une ujuh u snem ka Tnad syntiat jong ka sorkar India ruh ka phah ktien noh sha ka Seng ban wan iakren bad dei ha u snem 2005 ki sa ioh noh ia u Pastor Basiawmoit kum u ksiang, te ka jingtyrwa u Purno Sangma ka shu kut noh kumto.
Ka seng HNLC ka khmih lynti hapoh ka Sorkar Kmie kan pynrung iaka Seng HNLC sha ka jylli jong ka jingiakren ia suk khnang ba kin lah ban weng iaki jingeh ka Jaidbynriew kaba lah sahteng mynta 70 snem tam naduh ba ka India ka ioh jinglaitluid nakti ka jingsynshar ki Dohlieh, kumta ki long kiba la kloi ban iakren bad ka Sorkar India khlem kino kino ki jingbuh kyndon kampher lada ka dei hapoh ne shabar jong ka riti synshar ka India.
Ka seng HNLC ka kyntu iaki politician khasi-jaintia kiba don hakane ka sorkar thymmai ba ha shuwa ba kin buh jingma iala ka jong ka kam sain pyrthei jong ki, ki dei ban buh iala ka jong ka Jaidbynriew hakhmat, ki dei ban shimkhia lang ia kane ka bynta namar ka jingialeh ka HNLC kam dei na bynta ka roi ka par, hynrei ka dei eh na bynta ka jinglaitluid haka jingsynshar khadar.
Ka HNLC iohi shaikdar ba kane ka jingiatreilang ki Seng riewlum bad ka BJP ne NPP kam dei ba ki don ia kajuh ka pyrkhat pyrdain, hynrei ka dei eh ba ki don ia ki juh ki jingioh jingmyntoi, namar kata ka daw ka sain hima ha Meghalaya ka long thik kum ka Circus ha kaba bun naki politician ki dei tang ki Clown, bad katto katne bnai kane ka sorkar synrop ka lah ban khyllem. Ong u bah Saiñkupar Nongtraw Publicity Secretary, HNLC ha ka kyrwoh kaba la phah mynta ka sngi.
