Shillong, Nohprah 3: U shongknor ka House Committee jong ka KHADC u bah Gigur Myrthong u ba dei ruh u Deputy Chief Executive Member u la ong ba mynta dang pynkhreh ia ka kaiphot bad ha dien bala dep kin sa phah sha ka Executive Committee halor ka jingshem jong ki ha ka jingleit jurip sha Nongbah Jynrin.
Na ka liang jong u shongknor ka House Committee u la ong ba ha dien bala ai ia ka kaiphot ka shnong ha ka EC ban shim ia ka rai la yn thung ne em ia ka kynhun stad peit bniah ha kaba ia dei bad ka jingkynnoh ba ka don kata ka jinglait ka lyer na ki jaka thep ia ki jaka uranium.
Ha kane ka House Committee la kyntup lang ia ki MDC na ka liang synshar bad kum juh na ka liang pyrshah ban ia don lang bad leit ban ia kynduh ia ki briew sha kathain Nongbah Jynrin ban ia kren bad ban ia kynduh ia ki.
Lah ban pynkynmaw ba dei ha ka dorbar synrai jong ka KHADC ba ka iing dorbar kala shim ia ka rai ban thung ia ka House Committee ba kin leit ban jurip ia katei ka jaka ban ia kynduh ia ki nongshong shnong katei ka thain ban sngewthuh ia ka jingeh kaba ki briew ki ia kynduh.
