Shillong, Naiwieng 24: ka jingpynkhreh jong ka party NPP bad ka UDP na ka bynta ka ilekshon MDC shiteng samoi na Langrin Konstitwensi ka kdew shai ba ka sorkar ka lah ban pynlong noh ha u bnai kyllalyngkot 2020 hapoh jong katei ka Konstitwensi.
Ka party NPP jong ka Ranikor kan pynlong ia ka jingialang la shai ka sngi ban jied ia u kyrtong MDC, katba ka UDP kan pynlong ha ka 30 tarik mynta u bnai ha shnong Rangthong.
Ki thymmei khubor ki iathuh ba ka jingshah pynkhyllem noh ka Executive Committee jong u bah Teinwell Dkhar ha KHADC kala ktah jur ia ka party UDP bad NPP kiba don lang ha ka sorkar ha kaba ki khlem lah ban iada ia ka Executive Committee ban pynneh ia ka.
Ki thymmei khubor ki iathuh ba kala don ka jigniakren ba dei ban pynlong noh ia ka ilekshon MDC shiteng samoi ba lada jop ka party NPP ne ka UDP la lah ban weng ia kane ka EC kaba la ialam da u bah Latiplang Kharkongor.
Kumba ka long mynta ka iing dorbar jong ka KHADC ka don 29 ngut ki MDC ha kaba 15 ngut ki don ha ka liang jong u Bah latiplang bad 14 ngut ki long ha ka liang jong u Bah Teinwell Dkhar.
Ka jingiakren kala iaid ba lada jop ka NPP lane ka UDP ka jingdon ki MDC kan kiew sha ka 30 ngut bad lada don ka mat bym don jingshaniah shuh ia ka EC ka jingiathep vote kan long 15 la 14 ha kaba u Lamphang u ba la pynkhyllem ia ka EC u bah Teinwell un nym ioh ban thep vote.
