Shillong, Nailar 17: Ki khlieh nongsynshar mynta ka sngi kila pynlong ia ka jingkynmaw burom ia ka jingdap 69 snem ia ka jingiasoi ia Instrument of Accession (IOA) bad ka sorkar India, ia kane ka jingrakhe la pynlong ha Youth Hostel Shillong, ha kaba la don lang ki Syiem sordar bad ki seng bhalang.
Ha kane ka jingrakhe ia kane ka sngi, la ia kren ba ka sorkar India ka dei ban ai ka jingshai halor kane ka IOA, ym tang ka sorkart India hynrei ki District Council bad ka sorkar jylla ruh kumjuh ban ia shai ia kane ka dulir kaba la ai soi da ki 25 tylli ki hima jong ki syiem khasi.
Ha kane ka sngi la ia mir jingmut halor ka shithi kaba la thoh da ka sorkar pdeng sha ka sorkar jylla halor kane ka IOA bad ka sorkar jylla kala phah sha ki District Council naduh u snem 2012 ia kaba kim pat jubab haduh kine ki sngi.
Kum ka longmynta ia ki wei ki jylla ha ka Ri India ia ka bor shnong la paw shai kdar ha ka dur jong ki Panchayat hapoh jong ka jingpynkylla ia ka Riti Synshar jong ka Ri kaba 73 bad 74, katba ia ki hima khasi kala shu paw byrngut byrnget ha ka Sxith Schedule ia kaba la thoh ‘Succession of Chief and headman’ hynrei kam shymla batai ia kid or bar shnong.
Haba kren ha ki nongthoh khubor u Bah John Kharshiing u la ong ba ka IOA ka dang ieng haduh kine ki sngi wat la ki briew kila leh klet ia ka hynrei ka dang paw ha kiba bun ki bynta ha kaba ka sorkar jylla ruh kala juh pynpaw ha kiba bun ki bynta bad ka jingbym lah ban wanrah ia ka jingpynkylla ia ka Sixth Schedule ka dei ba ka don ka IOA.
Ha kane ka sngi kala mih ruh ka jingiakren ba lada kane ka jingialeh ban ioh jingshai halor ka IOA, kim ioh la ka dei na ka sorkar pdeng, ka sorkar jylla lane ki District Council, kala don ka jingiakren ba lada ym don lynti shuh da kumwei kin leit sha ka United Nation Organisation (UNO).
Kane ka jingialang kala shim ia ka rai ba kin khot ia ka dorbar Ri kaba san ha kaba yn sa pynbeit da ka Hima Khyriem ban ia kren kham bniah halor jong kane ka bynta.
