Shillong, Risaw 03: Ha ka jingialang bad ki khlieh nongsynshar mynta ka sngi kaba la long ha Madan Student’s mynta ka sngi u Chief Executive Member jong ka KHADC, u la ong ba ka jaidbynriew mynta ka shah hiar tham jar jar ha ki lai bynta, ka shong kha khleh, ka shim jaid kap bad ha u Drugs.
Ha kane ka sngi u Bah Shylla u la ong, khlem da jer kyrteng ia kano kano ka jaidbynriew, u la ong ba ka jingma kaba ap ia ka jaidbynriew ka dei na ka shong kha khleh bad kane kala pur sha kylleng ki kyndong kynshrot ha kane ka jylla Meghalaya baroh kawei.
Ki briew kiba kwah ban klun ia kane ka jylla, kim don lad ban thied khyndew, kim don lad ban khaii lait luid hynrei ban lait na kitei kiei kiei baroh ki shong kha noh ia ki trai jylla bad ha ka kyrteng jongki kynthei ki thied ia ki jaka puta, lada ym lah ban khang ia kane ka shong kha khleh ka jaidbynriew kala poi ha ka jingeh kaba khraw.
U la ong ba ka committee kaba la shna kyrpang ia kane ka ain kan shong la shai ka sngi ban ia pynbit pynbiang bad ha ka 10 tarik mynta u bnai kan don ka dorbar ba kyrpang ban pass ia ka Khasi Social Customs of Lineage (Amendment Bills) 2018 ban khanglad ia kane ka shongkha khleh, ia kiba la dep hap bad pdiang hynrei nangne sha khmat hap ban khang.
Kawei ka jingshah hiar thma ka dei ka jingshim jaid kpa, kane ka dei ka thma kaba mih napoh, lada shim jaid kpa ka jaidbynriew ka jaid bynriew khasi kan sa long kum kiwei ki para riewlum bad ynda la long kumta kan Panchayati Raj kan sa trei kam ha kane ka jylla Meghalaya.
Ka KHADC kala shim ia ka rai ba kan pynjlan shuh ia ka por ba kito kiba la shim jaidkpa ba kin wan ban pynkylla noh lem kumta ka KHADC kan shim ia ka rai ba yn nym ithuh shuh ba ki dei ki khasi namar kane ka long ka jingma ia ka jaidbynriew.
Ka thma kaba jar jar kaba ktah pat ia ki samla bad kane kan long ka jingma ia ka lawei jong ka jaidbyriew dei ka jingjyllei jong ki Drugs bad kane ka ktah ia ka lawei jong ka jaidnynriew dei na kane ka daw ba la aibor ia ki shnong ki thaw ba kin long kiba khlain teh lakam ia kine ki jingsniew.
