Shillong, Naiwieng 01: U Myntri Rangbah ka jylla u Conrad K Sangma u la ong ba ka sorkar kan ia kren bad ia mir jingmut ban wat ia ki lat ki lynti kumno ban pynbeit ia kane da ka jingiasngewthuh jingmut lang bad ka long kaba shai ba dei ban pynbeit ia kane ka jingeh kaba la sah teng mynta la slem slam bha ha kaba ia dei bad ka Them Motor.
Ka dei ka sien kaba nyngkong ha ka sorkar ha Meghalaya ba la shim ia ka rai kaba khlain bha ban weng ia kane ka jingeh, ka sorkar kala kut jingmut ban pynbeit ia kane ka jingeh bad ka sorkar kam shim ruh ia ka jingmut na ki paidbah.
Ka jingpynpaw ba kim kwah ban mih na katei ka jaka Them Motor ka dei tang ka jingpynsngew jong ki Riew shimet, hynrei haba peit na ka liang jong kiba bun kiba shong ba sah ha katei ka jaka kim don kata ka juh ka jingsngew, dei na kane ka daw ba ka sorkar kan pynbeit ia kane kyndon pa kyndon.
U Myntri Rangbah ka jylla u Conrad u la kren shai ba katei ka jaka kala dei jong ka sorkar ha dien ba la iasoi ia ka soskular ha pdeng ka sorkar, ka District Council bad ka Hima mylliem bad ia ka jinglong trai ia ka jaka la shimti da ka sorkar.
