Shillong, Nailur 27: U Lyngdoh jong ka riad mylliem u Bah C Marbaniang, u la ong ba ia kane ka jaka thang briew ha iew mylliem rim la ai sha ka seng khasi da ka san kur bad khatwei kur, ha kaba kum u lyngdoh u la soi bad la ai ia ka jingmynjur da u syiem jong ka hima mylliem.
Ia kaei kaba la jia ha ka 24 tarik mynta u bnai, u Bah Marbaniang u la ong “ nga leit sha kane ka jaka khlem da khein kamo khein ka diang, nga kyrpad ban ai lad ia ka jinglehniam, hynrei nga la ong ban buh teng noh shuwa ban plié ia u mawnongrim, namar u syiem ban plié ruh u khlem poi, bad ha dien kata nga mih noh bad ia kaei kaba la jia ha dien ngam tip”.
“Ia kaei kaba nga la soi ngam lah ban kylla, katkum kane ka map kaba don ia kane ka jaka la ai sha ka seng khasi ban shna ia ka kpep thang briew, kane ka long ka burom kaba khraw ban ai jaka namar kane ka hap hapoh ka jaka jong ka Raid”.
U Myntri Kharkongor u la ong ba ha katei ka por ba ai ia kane ka jaka u dang bat kum u secretary jong ka raid mylliem, bad ia kane ka jaka ruh ba la ai sha ka seng khasi la mynjur ruh da u syiem jong ka hima mylliem, hynrei kaba sngewsih ka long ba ka wan noh kane ka jingjia ba sngewsih, mano ba leh ruh um tip bad ia no ki ai FIR ruh ym tip ai ka iing bishar ba don burom kan ai ia ka rai kaba khuid. Hynrei na ka liang jong ka Raid bad ka san kur bad khatwei kur la dep ban ai ia kane ka jaka.
