Shillong,Rymphang 05: Ka KSU South West Khasi Hills District lyngba ka kyrwoh na u samla Pulljohn Wanniang, Asst. Education Secretary jongka KSU South West Khasi Hills District ka la kynthoh jur iaka sorkar Meghalaya da kaba ong ba ka ” Jingkyntait ban sanction Addl. posts ha Sngap Syiem College Mawkyrwat kumba la leh ha kiwei ki college ka jylla Meghalaya ka dei ka jingniewpoh, niewbein bad ka jingleh meinah iaka South West Khasi Hills District .
Ka Sngap Syiem College, Mawkyrwat ka dei tang maka ka College hapoh South West Khasi Hills District hynrei sngewsih pat ba ka sorkar kam shym la phai khmat iaka jingdonkam jongki samla pule jongka District. Ka sorkar katba kum ka jingtip jongka Seng haka Cabinet meeting ba dang shen ha Mihmyntdu ka la sanction kumba 290 tylli ki posts.
Ki 9 tylli ki college haka jylla kynthup iaki 3 tylli ki college ha East bad West Jaintia Hills, 1 ha Ribhoi District, 2 tylli ki college ha West Khasi Hills District bad 3 tylli ha Garo Hills da kaba iehnoh khunswet pat iaka college ha South West Khasi Hills District. Kane ka long kaei kaei ka bym Lah ban pdiang bad ka pynpaw tyngkrein baka sorkar ka niew shiliang iaki samla pule jong ka South West Khasi Hills District, kynnoh ka KSU.
Haka jingshisha, ka Seng naduh u snem 2014 ka la rah ia kine ki mat sha ka sorkar kynthup naduh ki memorandum ba ngi la phah sha ki Education Ministers bapher bapher. Ym tang katta, ngi la pynsngew ruh Wat ha u Chief Minister ka jylla u Conrad Sangma bad u MP jong ka Shillong Parliamentary Constituency u ma Vincent Pala halor ki jingeh kiba ki samla pule ka District ki mad .
Kaba sngewsih ka long la shu kut tang haki jingiakren hynrei la leh lyndet pat iaka sur ki nong South West Khasi Hills District. Ka seng kam doneiei ban kynthoh halor ka jingmang posts ia kiwei ki college hynrei Ngi sngew ruh ba ka sorkar ka dei ban peit khmat lem ruh iaka Sngap Syiem College namar ka dei tang maka ka college haka District bad ka dei tang maka ka ban pynbiang ban shim jingkitkhlieh ha kaban pynbiang iaka pule Puthi jongki samla ka District khamtam ia kito kiba wan naki longing ba duk.
Ka pule Puthi kum ka tynrai jongka roi ka par namar kata ka seng ka banjur iaki MLA jongka District ba ki dei ban pynbor iaka sorkar ban sanction post ha kane ka College bad ruh ban pynshai paitbah halor ka jingshah kyntait jongka District haka sorkar haba iadei bad ka jingmang iaki teaching bad non teaching staff ha kane ka College.
Kum ki MLA jong ka District kiba don ruh haka bor synshar jongka sorkar MDA ki dei ban kren eiei halor kane ka jingshah niew shiliang jongka District lada ki don shisha iaka jingkitkhlieh na bynta ki samla pule. Halor kane ka seng kan sa iashong pyrkhat halor kane ka bynta ban ia pyrkhat da kano ka lynti ban leh halor kane ka jingshah iehnoh bein haka sorkar bad haki nongmihkhmat paitbah.
