Shillong, Nohprah 18: U Samla Lambokstarwell Marngar President jong ka KSU haba kren ha ka jingrakhe ia ka lyngkhuh sngi iap kaba 79 jong u myllung Soso Tham u la ong ba ka jingdawa ia ka Inner Line Permit (ILP) ka dei ka jingdawa jogn ka jylla baroh kawei.
U la ong ba ka sorkar la shai ka sngi kan pynlong ia ka dorbar kaba kyrpang ban shim ia ka rai ban pyntrei kam ia ka ILP ha kane ka jylla, kane kan long ka jingdawa jong ka sorkar jylla na ka sorkar pdeng ba ka ILP ka dei ban trei kam ha kane ka jylla Meghalaya.
La ong ka rai kaba ka sorkar kan shim la shai ka sngi kan dang dei ka jingdawa kam pat dei ka ain, kum ka seng bad kiwei kiwei ki seng bhalang kin dang iai beteng ia ka jingiakhih kiba jai jai kin dang iaid beteng ban ioh ia ki ain ban ia da ia ka jaidbynriew ki ban long ka kud ia ka jaidbynriew.
La ong ba ka jingpdiang jong ka sorkar pded ia ka Citizenship Amendment Bill, kala pynkhih phaloh ia ka jylla baroh kawei bad kala pynkhiim biang ia ka jingdawa ia ka ILP ha kane ka jylla Meghalaya. La ong ba ka long kaba sngew tynnad ba ka sorkar jylla kan pynlong ia ka dorbar ba kyrpang la shai ka sngi ban pdiang ia ka rai ban pyntrei kam ia ka ILP ha ka jylla baroh kwei.
La iathuh ruh ba kila ia kynduh ia ki nongialam ka liang pyrshah kiba pyrshah ia ka ILP ha ki por mynshuwa ha kaba ki dawa hyrnei mynta kin ai ka jingkyrshan ia ka jingdawa ILP jong ka sorkar jylla kane ka long kaba sngewtynnad.
La ong ba ka por samla ka long ka por kaba biang bad ba bha tam ban leh ei ei na ka bynta ka Ri bad ka jaidbynriew. Ki kyntien jong u myllung Soso Tham kan dang iai im bad kyrshoi na kawei ka pateng sha kawei ka pateng.
