Shillong, Nailur 21: U Myntri Sorkar Pdeng ba dei khmih ia ka tnat Social Justice bad Empowerment, Dr. Virendra Kumar u la ong mynta ka sngi ba ka tnat ba u peit ma u ka kut jingmut ban wanrah ia ka imlang sahlang kaba pdiang lut ia baroh ki divyang. U la kren ia kane ha ka jingwan jong u sha Shillong ha kaba u la don ka jingialang bad ki heh Sorkar na ka tnat Social Welfare bad ki NGO.
U Myntri u la ong ba ki divyang ki dei shi bynta jong ka jingriewspah ka ri ha ka liang ka bor ki briew. U la ong ba ka tnat ka dang trei ha ka jingngeit ha ka ‘Sabka Saath Sabka Vikas’ jong u Myntri Rangbah Duh jong ka ri bad ba ka la pyntreikam shibun ki skhim ban wanrah ia kum kane ka imlang sahlang bad na ka bynta ka jingpynkupbor ia ki briew kiba don jingduna dkhot met.
U la ai jingkren shaphang ki kam jong ka tnat ha kine ki hynniew snem ba la dep, u Myntri u la ong ba ka Sorkar ka la pyrshang katba lah ban ai bor bad ai ia ka hok jong ki Divyang da kaba wanrah ia ka jinglong jingman kaba kdup lang ia baroh.
U Myntri u la ban jur halor ki prokram kiba ai jinghikai pyntbit na ka bynta ka jingpynkupbor ia ki Divyang bad ban kynthup lang ia ki ha ka imlang sahlang na ka bynta ka roi ka par jong ka ri bad ruh ban plié lad ia ki ba kin lah ban kyrshan hi ialade.
Haba kren shaphang ki skhim jong ka Sorkar, u Dr Kumar u la ong ba hapoh ka jingialam jong u Myntri Rangbah Duh jong ka ri, ka Sorkar Pdeng ka la pyntreikam shibun ki skhim na ka bynta ki Divyang ha kylleng ka ri.
U la ai jingiaroh ia u Myntri Rangbah Duh uba la pynkup bor ia ki Divyang bad u la ong ba la pynlong kumba 10,000 tylli ki jingialang jong ki Divyang hadien u snem 2014 ha kylleng ka ri, ha kaba kumba 20 klur ki Divyang ki la ioh jingiarap kaba kot sha T. 500 klur.
U Myntri u la pyntip ruh ba ka tnat ba u peit ma u ka la trei bor bah ha ki jaka ai sumar ia kito kiba la ngop ha ki jingdih jingbuaid bad ki jaka sah jong ki tymmen ki kro ha ka ri da kaba bynrap ba ia ka jingpeit bniah ha kine ki jaka la pyrkhing shuh shuh na ka kynta ka jingsumar bad ka jingshngain kaba biang ia kito kiba sah ha kine ki jaka sumar.
U Myntri u la leit jngoh ruh ia ka Kirpa Foundation ha Upper Lachumiere, Shillong bad u la iakren bad kito kiba sah ha kane ka jaka ai jingsumar. Ha ka jingbatai shaphang ki skhim bapher bapher jong ka Sorkar Pdeng na ka bynta ki Divyang.
U Myntri u la ai jingiaroh ia ki jingjop ha ka rynsan ialehkai Tokyo 2020 Paralympics kaba la long ha u Nailar-Nailur, 2021 ha kaba ki nongialehkai ka India ki la jop haduh 19 tylli ki takma kiba kynthup 5 tylli ki takma ksiar, 8 tylli ki takma rupa bad 6 tylli ki takma rnong.
U la ong ba ka Sorkar ka la shim ia ki sienjam na ka bynta ka jingai jinghikai kaba kyrpang ha ki kam ialehkai jong ki Divyang ha ki jaka bapher bapher jong ka ri kiba kynthup ruh ia ka Shillong.
U Myntri u la iakren ruh shaphang ka ‘The Rights of Persons with Disabilities Bill -2016’ ha ka por ba u kren shaphang ki kam jong ka Sorkar. Ia ki jingduna ba la ithuh la kyntiew na 7 tylli sha 21 tylli, u la ong.
U la ong ba ka Sorkar, lyngba kane ka Bill ka la kyntiew ia ka reservation na ka bynta ki Divyang na ka 3 sha ka 4 % ha ki kam Sorkar Pdeng bad 5% ha ka jingioh jingpule na ka bynta jong ki.
Ha ka jingkren shaphang ki jingma jong ki jingdih pynbuaid, u Myntri u la ong ba ka jingdih drok ka ktah ia u briew, ka longiing jong u bad ka imlang sahlang baroh kawei.
U la ong ba u dap da ka jingkhuslai shaphang kane bad u la ong ba kane ka dei ka jingeh kaba khraw ha ki jylla ka thain shatei lammihngi kiba don u pud u sam bad kiwei kiwei ki ri namar kine ki dei ki lynti ba ki nongkhaii drok ki pyndonkam bha.
U la pynpaw ka jingsngewnguh ia ki Sorkar Jylla kiba la leh katba lah ban tehlakam ia kane hynrei u la kyntu ruh ia ki ba kin trei kham bha ha kane ka kam khnang ba ki samla kiba la ngop ha kane ka apot kin lah ban ioh jingiarap na ki NGO bad ki skhim hapoh ka tnat Social Justice and Empowerment.
Ka dei ka kamram jong baroh ba kin ai jingpynshai ia ka briew shaphang ki jingktah jong ka jingpyndonkam ia ki drok bad ban iarap ia kito kiba la ngop ba kin kylla bamut, u la ong. U Myntri u la ong ba ka Sorkar ka la kut jingmut ban kot sha ki thong ha ka imlang sahlang ban weng ia kane ka jingma jong ki drok.
U la ong ba ka jingthmu jong u Myntri Rangbah Duh jong ka India ka dei ka Nasha Mukt Bharat kaba lah ban urlong tang haba ki heh Sorkar, ki NGO bad ka imlang sahlang ki iatrei lang ban weng ia kane ka jingma.
U Secretary ka North Eastern Council, u K Moses Chalai, Principal Secretary, ka Sorkar Meghalaya, u Sampath Kumar, ka M N Nampui, Commissioner & Secretary, ka Sorkar Meghalaya, ki heh Sorkar hapoh ka tnat Social Welfare bad ki NGO kiba trei ha kine ki kam ki la iashim bynta ha kane ka jingialang.
